Tuesday, May 26, 2009

Liänfeot-anâ In Onen

Nâko: Yohanes Manhitu

Ó, funan ma kfun sin Amoët Ko,
mufeitin funan ma kfun he npinan
he ntanâ hai ume nesun amanuat i;
he hai nabeî mîbaë nok fai ameûsinet,
ma he mîbén hai ‘nahê a-nbi monê.

Mabê i hai lof a-mnen etus ma nuün feü
lê hai naï ntaën nalali neu kai fai afinit i.
Etus neu ‘metan ahinet ma ‘belo amonot,
lê a-nmoin nabuan a-nbi nasi ‘naek es,
lê ka nmatulun fa es nok es on sobâ.

Ó, funan ma kfun sin Tuan Alekot Ko,
mnenfa au totis, kaisâ a-mpoh Ho lukem,
au aokbiakin nemanteanen he hai mîbaë,
ma hai naï nmam nalaljen he nmulai etus.
Seunbanit neu Ko, meûsinê sin Amoët.

Yogyakarta, Funboësamnuâ 2003

No comments:

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007