Wednesday, May 30, 2018

MUFNEKAN NAOTE IN FUAN

Foto: www.google.com

Nbi neno mé ho musaitan kuan,
kuane nabala, nasain in tuan.
Ho mtòp lalan masi nok ulan,
mufnekan ho naote in fuan.

Atuis: Yohanes Manhitu
Yogyakarta, 22-04-2018

HO LOF KA MNEN KAU FA

Foto: www.google.com

Nbi akimû, ho moën kau,
me slutuf i ka nasnás fa.
Masi uhín i nâko sekau,
ho lof ka mnen kau fa.

Atuis: Yohanes Manhitu
Yogyakarta, 06-04-2018

KALU KA MBI FA HUMAK


Foto: www.google.com

Mhoensom òm he npaumák
nbi oras au he 'fei au matak.
Kalu ho ka mbi fa au humak,
matak i lof napén ma npetak.

Atuis: Yohanes Manhitu
Yogyakarta, 05-04-2018

KAISÂ MUMTAU!


Foto: www.google.com

Ho ala tuaf mesê ko,
me ho loimte namfafau.
Nbi oras ho fê mansian ko,
mutís lomit, kaisâ mumtau!

Atuis: Yohanes Manhitu
Yogyakarta, 03-04-2018

MASI NBIN FAUTPUTUN

Foto: www.google.com

Neno i, manse fê napoinon,
nhoi naijan nèk maputun.
Senat ok-okê natolon
masi nbin fautputun.

Atuis: Yohanes Manhitu 
Yogyakarta, 03-04-2018

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007