Tuesday, March 31, 2015

Nekmanekat


Molke nak neno i ném neu nekmanekat,
ma nekaf akninô nan musti mapanat
he nbi oras susar, in nèk malinat;
nbi mèsökan, in a-njail apinat.


(Yohanes Manhitu, 14 Funnuâ 2015)

Pules ma Seunbanit


Ala pules ma seunbanit 'naek
fun neno i, au fê nabè'i 'haek
ma u'ét kuk meûsinê 'nanaek
lê he ntanâ nenô in mamoëk.

(Yohanes Manhitu, 1 Funtenû 2015)

Hanfualeko: Prancis-Metô


En dawan: "Kalu ho ka mliû mutuin sâ lê ho mlomi, ho lof ka mupèn míte fa." (Au tlakab nâko hanfuafin nèk uab Prancis lê matuï es foto i, 20 Funtenû 2015)

Ho Nekme Musti Namás Piuta


Ho humam nane nenbes lof ka namás fa ben,
me ho nekme musti namás piuta.
Nmuî sâ lê lof ka nabalbál fa,
me sâ lê nabala musti namlia piuta.

(Yohanes Manhitu, 10 Funtenû 2015)

Kaäsaitan Mepu



Atuis: Yohanes Manhitu

Manse nabaiksonen a-nbi neno i
oras Funtenû ném ma nhosén kau
onlê amakisot nâko pah kamahinê
lê namkakab kau nèk in etus feü.

Manse ka nmapút fa nbi neno i,
feësat ulkapi ntoman hun amliat
lê matel fun in niun nan oe ulan --
oe apopit lê naneuk nain afuskukû.

Manse fê natón human a-nbi neno i,
masi nbi bale bian nipu ntanús nane,
masi nbi kota 'naek in ka mamnitâ fa
fun uemfatu mnanû nakín nan matak.

Manse nmakios piuta talantea neno i,
ma ka nasaitan nít fa mepu nenbes
onlê amakoet lê ka nasaitan banit
masi sâ-sâ onhe naëkâ in lalan.

Manse lof nasaitan kit neno i
me ala leku fauk in he nhelon
he natutan mepu nbi pisâ bian.
In a-nmeup nabala me naëbon.

Berbah, Yogyakarta, 2 Funtenû 2015

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007