Sunday, August 31, 2014

Nbi tabu nope nfin



Nâko: Yohanes Manhitu

Nbi tabu nope nfin, au ít funan ameûsinet; 

oras nope nlak, au nekke natnín amlilat.
Fai i ka nmuï ntèn fa nope aëkâ funan,
mabê i funne nmeûsín nèk malinat.

Nope nane aëkâ lalan neu mlilê,

funan nane es laismanekat amasat.
Neno i au ít laismanekat amaneot kun
fun kanan ekâ neu sonaf amlilat natfai.

Yogyakarta, Funhitû 2003

Nenô ma fai afinit



Nâko: Yohanes Manhitu

Afi unû, in es funan ma kfun apinat,
amnèkmeûsinê amaneot piuta.
Nenô ka nsek nít fa in masan,
fai ka nliû nít fa in malulen.

Oras nekaf nua natnoen nabuan,
naijan namás, neno-tunan naklimâ.
Ka ahín’uab napoitan lasi alekot,
hanfuaf amaste nsai ka nasnás.

Tabu tasi nbatâ nekaf mafnekan,
nenomatne natból nâko neonates
ma okê a-nhelson natuin neonsaet.
Funan ma kfun ka nmuïn fa pinan.

Neno i, lakat amnanut musti namsòp,
masi funan ma kfun ka nfen fa pinâ.
Tabu i, naot mafnekan musti nmót,
masi ‘fulâ ka ntulû fa in fomenin.

Apakaet In lulut es amaneot piuta,
amoët In lekat musti masimô nabala.
Nekaf nanan nane hanaf neno-tunan
lê musti matninâ, lê musti manenâ.

Nope amèsökat lof a-nfin kun;
nipu atais lof namneâ, namneuk.
Mauthe manse nmeûsín piuta
ma funne ntanâ fai ametak.

Kupang-Timor, Funnuâ 2004

Ho mfin kum mok funan



Nâko: Yohanes Manhitu

Fai natnán, funne natból,

pah-pinan mnesamnés,
au aim he ít ho masam
nbi funne in meûsinen.


Nenomatne he ntea ben
he nhoi pah nèk maputun,
ho mfin kum mok funan,
mubalab kau nektuäs.

Me monit ka nasnás fa
masi ho masam apaisâ
nasaitan au nanaitin
fun au ufnekan piuta.

Yogyakarta, Funhâ 2007

Mpanat paku he npin nabala



Nâko: Yohanes Manhitu

Anin pah-pinan i lof ka nabè’ fa makain

ma nautus nabè’ natból nokaskeken.
Es onnane, mpanat ho paku he npin
he ntanâ lalan neu bale mafnekan.

Haef-haef ho paku onlê he nmaet

fun minâ he okê aî anin namép.
Me lablaba he muheun mufanî
ma mukín mane nâko anin in fún.

Lalan fê namnaun ma anin nabala

ma in naim piuta he nâmaet paku
lê nasoin ko nâko mèsökan ‘naek
nbi lalan neu ho bale mafnekan.

Mpanat ho paku he npin nabala

masi anin humâ-humâ he nâmate
nèk fut amepat ma slutuf manenû,
fun ala ho es paku in apanat alekot.

Yogyakarta, Funhâ 2008

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007