Sunday, December 31, 2017

Gitanjali 28; Atuis: Rabindranath Tagore



Tainbesi afutsin namepan, me au nekke namén oras au uäkâ he ‘fek ain sin.

Laisfètin, ala kun in es au ‘lomi, me he ufnekne, au umaebok kuk.

Au nekke namép ak a-‘maus upmâfénleüf es ho, ma ho es au abiät alekôsekê, me au nekke ka ntea fa lakat he ‘polin mnautpisänâ lê naheun au keän.

Kastenus lê a-nkub kau, nane kastenus atahan afuskukû ma mates; au ka ‘lomi fa, masi onanne, au ‘hobe èk manekat. Au utús ka babaun fa, au ‘mòf haef-haef, au mae mâkolô ma nmâfén; masi onnane, au òm he ‘toit neu au ‘lekok, au umtau ûtaï kaiskaisâ au onen matulek.

Gitanjali 24; Atuis: Rabindranath Tagore




Kalu neno ntea ben, kalu kolnin ka nkaen ntènin fa, kalu ainne nhae kunen he nfú piuta, neu mhel mèsökan in amut he mkub man kau, masi onlê ho mäum mulail pah-pinan mèk tupse in amut ma baun-baun a-mkub terate akuate in nokin a-nbi akimû.

Nâko anaolalan, lê in aulbukae luman oras fêka nasòp lalan, lê in aptaise natpius ma afuskuk’e ntoman, lê in mâtanen namneuk nain kunen, mnoes main fa mae ma mâmuït, ma mûfeü in monit onlê hausuf’e nbi ho fai alekot in kasteunse nanan.

Sunday, October 29, 2017

Gitanjali 23

Foto: www.google.com
 
Nâko: Rabindranath Tagore

Ho he mnao nok fai aänislutuf i meu ho naot manekat, ò aokbian? Neno-tnanan nanoi onlê tuaf neksusar.


Au ka ‘tup fa mabê i. Haef-haef au usoin enô ma ‘kios eu mèsökan nae, ò aokbian!

Au ka ít fa sâ-sâ a-nbi au matak. Au utoit ûfain’ok ho noibme es mé!

Mutuin noe metan mé in ninen amèsökat, mutuin nais-mâlelat mé in ninen akloö, mutuin mèsöka-mnanû mâneät mé ho meun ho lakat he òm meu kau, ò aokbian?

Tlakab neu Uab Metô: Yohanes Manhitu

Gitanjali 22

Foto: www.google.com
 
Nâko: Rabindranath Tagore

Nbi hafof amnauntin nâko Funhitû lê nok ulan, mèk lakat mâkolô, ho mnao, mnesamnés onlê fai, mûló kum mûko apaot ok-okê.


Neno i, noknokâ nâbilen, ka nlae nan fa anin neonsaet amanenut in koâ kaäsnasat, ma toil-mafauban masikô ben nâko neno-tnanan biru abeät piuta.

Naijánaisnin ka nsín ntènin fa ben, ma ume es-es in nesun maëkâ ok-okê. Ho eslê aönit mesleko mbi lalan masaitan i. Oh au biâ mesleko, manekâsekê neu kau, au ume in enônaekin masoin—kaisâ mtanhai mfin onlê nanait.

Tlakab neu Uab Metô: Yohanes Manhitu

Wednesday, September 6, 2017

NSINMAKAN MÍS MAFU

Foto: www.google.com

Kalu ho nsinmakan mís mafu,
ho lof nabè' muplák meu afu.
Monit ka nminoin fa onlê tefu
ma ka nok fa susu aheun nifu.


Atuis: Yohanes Manhitu
Yogyakarta, 06-09-2017

MEPU NMUÎ IN FUAN

Foto: www.google.com

Noknokâ i, au ala ufnekan
au Apakaete In manekan
he tala neno lê i in tuän,
au mepu nmuî in fuan.

Atuis: Yohanes Manhitu
Yogyakarta, 06-09-2017

KAISÂ TASÍK PIUTA

Foto: www.google.com

Neno i ka namnés fa nok afi,
ma fai i msâ naik nâko fini.
Nenô-fai hit kaisâ onlê fafi,
lê nasík aminat masi ka ini.

Atuis: Yohanes Manhitu

Yogyakarta, 05-09-2017

KA MJAIL FA ALEKOT

Foto: www.google.com

Nok fai kalu ka muhín tupas,
nok nenô kalu ka muhín mepu,
neu atenus, ho ka mjail fa abas;
neu anaot, ho onlê ulan ma nipu.


Atuis: Yohanes Manhitu
Yogyakarta, 05-09-2017

Thursday, August 31, 2017

AU NEKAK NOK IN MALAK

Foto: www.google.com

Kalu he mubák man au nekak,
kaisâ mtek mûmoe au kanak.
Kalu mubák mane, mubelak,
fun au nekak nok in malak.

Atuis: Yohanes Manhitu

Yogyakarta, 29-08-2017

MUMEPAN HO SALIT


Foto: www.google.com

Mfe tabê neu noknokâ amnemat
lê a-ntea ma nhoen ko neu fnekan
he mumepan ho salit ma mnaomát,
onlê he mhalín ho feotnai in nekan. 


Atuis: Yohanes Manhitu
Yogyakarta, 04-08-2017

Monday, July 31, 2017

Gitanjali 21

Foto: https://www.youtube.com
 
Nâko: Rabindranath Tagore

Au musti auf au bnaobe in toli nai. Tabu ahaetin a-nfinin a-nlekun tasi-ninen—Adú sin néman neu kau!

Oras haunatún nalail sufan ma nasnásen. Ma oras i, èk hausufâ amaknenê kaäjalit in baut, au ‘pao ma ‘moin piut.

Tasi in okî naslút, ma nbi tasi-ninen a-nbi lalan amnókmafô, haunoö amolkin nâbeok’in ma natkuan.

Lo baelluman eslê ho mupén meun!

Ho ka mutnín fa nek’âtaï nfin natuin anin nèk sít nâko bale âlóte in hanan lê nâlae nâko tasi-ninen bian?


Tlakab neu Uab Metô: Yohanes Manhitu
----------------------------------------------

[1] Labit: musim semi; Ingris: spring; Portugis: primavera.

[2] Nbi dialek bian (Amanatun ini), matekâ nak haunô.

Gitanjali 20

Foto: eugenehon.blogspot.com
 
Nâko: Rabindranath Tagore

Nbi neno nan, nbi oras terate nasúfen, adú, au nekke namneuk, ma au ka uhíne fa. Au ‘poni luman ma ‘fulâ nane ka makisô mnitâ fa.

Ala oras i ma ntènintèn, neksusre ntoman kau, ma au u’úb nâko au nanait ma ‘rasa nobif aminonit nâko fomenî-es lê naik kun a-nbi anin afút nâko knaben-ahinet.

Minonî sab-sáb nane namenab au nekak nèki mnaut ma au ‘kiso, in onlê foknaise snasan asinmakat lê fê naim in henun.

Au ka uhín fa ak in a-npaumák nís, ak nane aubê, ma ak minonî ahenut i npoi nbi au nekak in kòpun amnanut nae. 

Tlakab neu Uab Metô: Yohanes Manhitu
-----------------------------------

[1] Labit: teratai; Ingris: lotus; Latin: Nelumbium nucifera.
[2] Nbi dialek bian, matekâ nak nanaif ma unmait.
[3] knaben-ahinet (Labit: selatan; Ingris: south).
[4] Nbi dialek bian, matekâ nak meunanâ.

Friday, June 30, 2017

Gitanjali 45

Foto: www.google.com

Nâko: Rabindranath Tagore

Ho fêka mnen fa in lakat kaäslutus ka?

In ném, ném, in ném piuta.

Tabu ma oras es-es, nenô-nenô ma fai-fai in ném, ném, in ném piuta.

Au ‘sí síte namfau ben a-nbi neklomit amfaut, ma sítin nane sin nótin natonan piuta nak, In ném, ném, in ném piuta.”

Nbi neno afomentin a-nbi Funhâ ameûsinet, natuin lalan abít nasi nanan, in ném, ném, in ném piuta.

Nbi mèsökan nok ulan fai Funhitû sin, nbi kereta aslutus, in ném, ném, in ném piuta.

Nbi susar nasòp susar, nane in laktin lê napènit au nekak, ma nane in haen nok leöt a-mnatû es a-nmoê au mlil’e nmeûsín.

Tlakab neu Uab Metô: Yohanes Manhitu

HANMEÛSINÊ NEU KALAT


Foto: www.google.com

Atuis: Aníbal Núñez

In a-ntok nalali nbi musu nakte in matan

nbi ‘tokô âbekô, ma naäibon kun nâko
ken’apótin, nkumain: kenfuaf ahunte
nmoê bifé nae napáp maneunleüf.
In lof nâbekô nabala kun
tala sin ok-okê nalail kenfuaf ma upat.

Tlakab neu Uab Metô: Yohanes Manhitu
Berbah, Yogyakarta, 29 Funnê 2017

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007