Thursday, January 31, 2013

Ait ho he mfain òm



Nâko: Yohanes Manhitu

Ton amnauntin nfininen
ma ho musaitan kau ben.
Onlê askeket nâko nanait,
ho nekme fê a-nmoin ka?

Oras au nekke fê namlia
neu fnekan ma manekat,
fun sinmakat afulit bian,
ho mtanhai hit hanfekat.

Munî i, naskék ho mutoit
ma mpô kau nâko pnikan.
Nâko tuis lê ho msònû,
ait ho he mfain òm ka?

Kefa-Timor, Funnuâ 2011

Thursday, January 24, 2013

Aof lê naheun nok "misteri" 'naek


Hit aoke lof natuin hit lomit kalu in maükan ma mânoinâ piuta tèk disiplin atomas he natuin plenat, lê ném nâko hit neöp. Haef namfau hit tamkák fun tít atoni onle Bruce Lee lê nabè' nahín teknik alekot ma amasat he npaek in aone ma namliab hine maüpâ nane he nfit naäitî in pahe kanan. Mansiane in aon namkakab kit fun in fê naheun nok "misteri" 'naek.

Saturday, January 12, 2013

Neksabar in fuan


Haef namfau hit taneöp 
tak lalan abít hit matak maëkâ 
ma hit ka tmuî fa pilit bian. 
Me kalu ka tasmán fa ma tkios lekleok tèk neksabar, 
hit lof tít lalan masi in ka nmanua 'sekê fa.

Tafnekan ma tamliab toes


Nbi oras hit tafnekan he neno amnemat nèk kit alekot ma mlilê, 
hit tamliab toes neu Uisneno In tulun lê ka nmuî fa tuän.

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007