Saturday, December 31, 2016

Gitanjali 19, Rabindranath Tagore; Versi Metô

Ilustrasi: www.google.com

Kalu ho ka mumolok fa, au lof utua au nekke èk ho ét ma ‘sutai je. Au lof uëbok piuta ma ‘pao onlê fai nok a-kfun âhakê ma ini ‘nakan lê nabés a-nfin nèk neksabar.

Noknok’e lof ném a-‘teb-téb, mèsökne lof namneuk, ma ho hanme lof nat’óp nasan’on a-nbi saif a-mnatû amfaut lê natau nan neno-tnanan.

Oket ho hanfuafin lof natpenen[1] nèk sít nâko au kolnin sin kunâ es-es, ma ho melodi-sin lof natkaufan nèk hausufâ nbi au haupukan ok-okê abitin nasi[2] nanan.

Atlakab neu Uab Metô: Yohanes Manhitu  


[1] Nbi dialek bian, matekâ nak naplelen ma natëlen.
[2] Nbi dialek bian, matekâ nak ‘lamu.

Gitanjali 17, Rabindranath Tagore; Versi Metô

Ilustrasi: www.google.com

Au ‘pao ba manekat he ‘non’ok masi kleö eu ini ‘niman nanan. Es onnane, ntelat nísen ma au usanab fun seni amfautin nane.

Sin néman nèk sin hukum ma nono ok-okê he nfut kau laba; me au ‘helsok kuk piuta fun au ‘pao ba manekat he ‘non’ok masi kleö eu ini ‘niman nanan.

Atoinin nasán kau ma ntek kau nak kaätaomataf; au ka neknuâ fa, sin a-ntoman he nasán kau.

Neno ‘pas’e nfinen ma ânepâ sin mepu nmóten. Sin lê néman he noën kau kakê-kakê ‘nnaon nfanin nèk toäs. Au ‘pao ba manekat he ‘non’ok masi kleö eu ini ‘niman nanan.

Atlakab neu Uab Metô: Yohanes Manhitu

Wednesday, November 30, 2016

Gitanjali 64, nâko Rabindranath Tagore, versi Metô

Ilustrasi: www.google.com
 
Nbi noe kaäslutus in aikenib, nbi hun amnanut in nanan, au utoti, “Bifé munif, ho he mnao on mé, es mukín man ho paku mèk ho mantel? Au ume mèsökan okê ma mnesamnés—mfe kau fa ho paku!” In naäitî matan ametak ka ‘ló fa ma na’ét au humke nbi neon’akimû nane. “Au òm eu noe,” in nak, “he usaib au paku neu noe in sain oras neno in pinne namsáb a-nbi neontés.” Au ‘hake ‘més ‘bi hun amnanut in nanan ma upén in paku pinan an-anâ lê he namneuken a-nbi oe sain asaet-asanut.

Nbi fai pukan in ét, au utoti, “Bifé munif, ho pauknin a-npinan okê—ho he mnao on mé mèk ho paku? Au ume mèsökan okê ma mnesamnés—mfe kau fa ho paku!” In naäitî matan ametak he na’ét au humak ma nkios kau nèk neknuâ. “Au òm,” in nasòp nak, “he ‘tulû au paku neu neno-tnanan.” Au ‘haek ma upén in paku npin lum-lúm a-nbi baelluman.

Nbi fai’atnanas ka-amnók-funan in meûsinen, au utoti, “Bifé munif, ho he mtoit sâ es ho mhaumakab paku neu ho ‘basam? Au ume mèsökan okê ma mnesamnés—mfe kau fa ho paku!” In nasnás tuk’es ma naneöp, okê namasan kau nbi mèsökan. “Au òm èk au paku,” in nak, “he utuin fesat paukpinâ.” Au ‘haek ma upén in paku nlem lum-lúm a-nbi paku sini tnankin.

Atlakab neu Uab Metô: Yohanes Manhitu

MEPU FÊKA NASNÁS

Ilustrasi: www.google.com
Mu'ét! Manse nsae ma nmapút,
nhoi pah, me ulne npao in oras.
Tuaf es-es fê naim neu in parlút.
Es onnane, mepu fêka nasnás.

Atuis/Alulat: Yohanes Manhitu
Yogyakarta, 29-09-2016

TAMNAU HIT KUAN

Ilustrasi: www.google.com

Feës-feës hit lo tamnau hit kuan
masi oras i, tjail pah bian in tuan.
Hit taim he tapèn mepu in fuan,
ma neu mlilê, es-es nok in uan.


Atuis/Alulat: Yohanes Manhitu
Yogyakarta, 25-09-2016

MA HO ES FEOTNAI

Ilustrasi: www.google.com

Ho mak ho mtakan nenô, te au 'takan fai,
me futus mafnekan i ka tloim fa he natfai.
Nbi ho tupas fai i, au ufnekan he mumnai
ala amasat a-nbi sonaf, ma ho es feotnai.
 

Atuis/Alulat: Yohanes Manhitu
Yogyakarta, 22-09-2016

Monday, October 31, 2016

Gitanjali 101, nâko Rabindranath Tagore, versi Metô

Ilustrasi: www.google.com
 
Haefes a-nbi au monit, au aim ko èk au sítin.
Sin es a-ntaul kau nâko nesu neu nesu,
ma au utninoken ok sin,
he aim ma ‘leô au pah.

Nane au sítin es a-nfe kau ‘noinâ ok-okê lê au utuin ít sin;
sin a-nlekan kau lalan mâkolô, sin nèk neu au matak
kfun namfau nbi au nekak in sukit.

Sin nèk kau neno ‘teme es neu pahe in misteri mlilê ma susar,
ma namunit, sin nèk kau neu sonaf mé in enônaek
nbi mabê oras au naolalan namsòpen?

Atlakab neu Uab Metô: Yohanes Manhitu

HO*

Ilustrasi: www.google.com

Atuis: Elena Lilian Popescu

Ho, fai nâko fai,
lê nahunun monit i,
lê nâko in,
naskeket
monit natból ném
fun in esne ben
nabalbál,
monit lê he ném a-nbi neno unû
nanonbon nok tabu anaot
natuin monit ok-okê
lê natolon ma nmaten
ka nasnasan fa ….

Ho, laismaneot mâkolô
fun masi ala matekâ,
ho lof mumneuk kum
mûko hai matam amèsökat,
ho mmoin neu kai
ma ho es hai nanam, fê es i
talantea nabalbál ….

Ho, tasi nâko ai apinat
lê ka nòt fa, me namaol
nèk in pinan ameûsekê
lê maneunleüf kun,
ho okî afaes-ameut
nabainâ tuafe ‘moën, nane in
lê a-nbi ‘munun, natnín monit nabók,
saet ma sanut,
neöt ma ét
henu ma luman, haef mesê –
ma nbi oras nane msâ,
ka nmuî fa nobamesen,
humaf lê hanfuaf ka nalilê
lê ka nabè’ fa mahinê leko.

Au puisi namneâ
nbi mèsökan lê a-nkub nan ko,
nbi nipu mafauban nanan
lê ka nasonâ fa lalan
he ho humam aklimâ maëtâ.


Tlakab neu Uab Metô: Yohanes Manhitu
Yogyakarta, 30 Funhâ 2015


-------------
*) Puisi Metô i matlakab nâko versi Spanyol ma Ingris lê matlakbinen natuin versi asli "TU" (nèk uab Rumanias). Elena Liliana Popescu (http://www.elena-liliana-popescu.ro/en/about.htm) nane atuispuisi 'naek nâko Pah Rumania.

Friday, September 30, 2016

Mubalab kau nobim

Foto: www.google.com

Kaisâ mlak kum mutuin fai anaote
ma mubalab kau nobim he umnau.
Au ka 'loim fa he nbi leku amnemte,
au ala tuaf lê ka nafnekan fa sekau.

Hanfuafin: Yohanes Manhitu
Yogyakarta, 19 Funsiô 2016

Thursday, September 15, 2016

Tabu in lomit

Foto: www.google.com

Fai mnanû i nsekal nenô afinit
ma hit fê es kit i, tanaob monit.
Sekau es a-ntulek tabu in lomit?
Hit ala tatutan naot ma mnamit.

Hanfuafin: Yohanes Manhitu
Yogyakarta, 15 Funsiô 2016

Tanaob kuk kanan mepu

Foto: www.google.com

Fê onlê neno-neno, hit tanaob kuk
kanan mepu he tatís tan salit ok-okê.
Ma nâko hit nekak nanan, natuin luluk,
onen totis masaeb ka nok fa 'sekê.


Hanfuafin: Yohanes Manhitu
Yogyakarta, 15 Funsiô 2016

Tèk Usî manekan

Foto: www.google.com

Tolas-èkut nabuab kit haef-haef
nbi neno ma tabu lê mafnekan.
Ainaf-amaf, olif-tataf, ma baef,
taheun nekak tèk Usî manekan.


Hanfuafin: Yohanes Manhitu
Yogyakarta, 14 Funsiô 2016

Tuesday, September 13, 2016

Seunbanit neu Usî


Foto: www.google.com

Neno i, monit ma mepu fê matutan,
ma hit tafnekan he tapèn ala mlilê.
Masi hit tah luma, ka nok fa utan,
seunbanit neu Usî musti malilê.

Hanfuafin: Yohanes Manhitu
Yogyakarta, 13 Funsiô 2016

Sunday, September 11, 2016

Tasi nae ini 'punun

Foto: www.google.com

Tasi in manuan ma mnanun
hit nabè'i tsû'e leko tala tapèni.
Ma neno-neno, tasi nae ini 'punun
ntaul kau neu ho hanam he au upèni.


Hanfuafin: Yohanes Manhitu
Yogyakarta, Funsiô 2016

Tabu naen ka nasnás fa

Foto: www.google.com

Tabu naen ka nasnás fa nèk makoet
ma nabalab kit nobin a-nbi nenô-fai.
Hit mansian a-tmeup on amanoet,
tafnekan he enô neu mlilê natfai. 


Hanfuafin: Yohanes Manhitu
Yogyakarta, 11/09/2016

Tuesday, August 30, 2016

Laistoes ma laishine lof namlian piuta

Foto: www.google.com

Mnatû ma noinmutî lof nabè’ namnekun;
sonaf ma ume aklimâ lof natkuan onlê baki;
bijaemolô, bijaemetô lof nabè’i nëusfanin,
me laistoes ma laishine lof namlian piuta.


---Yohanes Manhitu, mamnaitî nâko puisi
'Maus Amaneot (Funfanû 2003)

Uisneno ntui tuafe in uan!

Foto: www.google.com

Fnekan fê es taismanuan,
molok fêka napoin in fuan,
ma es-es fêka nmuî tuan.
Uisneno ntui tuafe in uan!


---Yohanes Manhitu, nâko puisi
Hit lalne fê namnaun (2007)

Sunday, July 31, 2016

Gitanjali 26

Ilustrasi: www.google.com

Nâko: Rabindranath Tagore

In némen ma ntoko nbi au bnapak, me au ka ‘fen fa.
Nane lo tupas kamalomîsekê, ò kasian neu kau!

In nemantea oras fê fai; in harpa nbi ini ‘niman,
ma au nanaitin ok-okê nâtaï fun in melodi.

Adú, nansâ es au ufín ain fai amfautin? Ah, nansâ es au unekun ain in etas lê ini snasne ntoman au tupas?

Tlakab neu Uab Metô: Yohanes Manhitu

Neno ném ma nfín

Picture: www.google.com

Ka nmuî fa tabu lê nabala nbi balan;
ka nmuî fa oras lê ka nahín fa lalan.
Neno ném ma nfín natuin In lomit.
Nbi neno i, hit fê tatutan mnamit. 


(Atuis/Alulat: Yohanes Manhitu)

Thursday, June 30, 2016

Gitanjali 18, nâko Rabindranath Tagore, Versi Metô

Foto: www.google.com


Nâko: Rabindranath Tagore

Nope natutbon neu nope ma nmès’ók.
Ah, manekat, nansâ es ho mufètin kau he ‘pao
‘mesmés kuku ‘bi monê, ‘bi enô i?

Nbi oras sonet neu mepu amfaut a-nbi nenô,
au ok atoni ‘tepânaek; ma nbi neno mèsökan oras au ‘més,
au ufnekan eu ba ko.

Kalu ho ka mulilê fa ho humam neu kau,
kalu ho mpesbiâ kau nabala, au ka uhín fa onmé au lof
he ufinib oras ulan amnauntin.

Au upén ka usnás fa neno-tnanan in pinan âlôsekê nae,
au nekke naöin ma nkae natuin anin nek’asebot. 

Tlakab neu Uab Metô: Yohanes Manhitu

ETUS PALPALÂ NÂKO KUAMNASI

Foto: hatobuilico.wordpress.com

Atuis: Yohanes Manhitu

Humaf-humaf lo namlilê he nseun ko, Aokbian,
oras ho musaitan kota ma mfain meu ho kuan –
baelmahonit lê nafètin ko ben he mlak tasi.
Ho mtae mufanî foto oras ho fê an-anâ ko
ma mkios bale oras ho unû mûbaë mbin
mok ho aombiamin lê munî i esan kuan
aî ‘ló ben sin natuan esan bale bian.

Nbi kuan-es ho mupén lalan lê maäspálen,
ho mít oe lê munî i nsai ntam neu ume
natuin bèskanu lê ném nâko ‘nuüf nae.
Fai-fai paku npin onlê neno fê manas
ma ka mít fa pakûfenu nok paukminâ
fun sin nuasin mabelâk es tetu tunan.

Me sâ-sâ alekot ma amasat lê matekâ nane,
fêka ntea fa pah ma nifu in tunan ma in ikon
fun nbi bale namfau, fatu ma ‘bolâ natau lalan,
oe mamnamî ma masosâ onlê mnautbuâ
ma mèsökan fê nanaob kun in kuasa.

Yogyakarta, Funtenû 2009

Tuesday, May 31, 2016

Gitanjali 76

Foto: www.google.com

Nâko: Rabindranath Tagore

Neno nasòp neno, Ò au monit in usif,
au he ‘haek ma humaf nok humaf ok ko.
Èk au ‘nimak maliäk, Ò usif neu pah ok-okê,
au he ‘haek ma humaf nok humaf ok ko.


Nbi ho neno-tunan manuan in nupun, ‘més ma kaüslút,
èk nekbaun, au ‘haek ma humaf nok humaf ok ko.
Nbi ho pah-pinan ameput, lê naslút nok banit mâfenâ
ma laismepat, nbi to-amfaut amanapat sini tnankin
au he ‘haek ma humaf ma humaf ok ko.


Ma oras au mepu nmoten a-nbi pah-pinan i,
Ò Usif neu kanan usif, ‘més ma ka hanës fa,
au he ‘haek ma humaf nok humaf ok ko.


Tlakab neu Uab Metô: Yohanes Manhitu

Gitanjali 75

Foto: www.google.com


Nâko: Rabindranath Tagore

Ho fét neu kai atonîhonis natís hai parlútin ma masi onnane, nfain nèt neu ko ka nasnás.
Noe nok in mepu neno-neno he manaob ma nmanáp natuin lele ma ‘sane; masi onnane, in sain kaätfekas nane nliänfain kun he nboe ho haem.

Hausufâ nminonib anin nèk in fomenin; me in mepu amunit eslê he ntul’on neu ko.
Fuat neu ko ka nmâmuïb fa pah-pinan. Nâko atuipuisi in hanfuafin nane, mansian nait otaf sâ lê namlileb sin; me sin otaf amunit a-nlul neu ko.

Tlakab neu Uab Metô: Yohanes Manhitu

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007