Thursday, May 31, 2012

Malaikat Amasat


Nâko: Yohanes Manhitu

Ai, malaikat amasat, aklimâ!
Ho matme onlê manas aklahat;
ho humme onlê funan atanâ fai;
ho ‘nakamnafum lo onlê absutra;
ho aome lo nfomén ma nmaluel;
ho hanme onlê sít alumat mapules.

Haef-haef au utenab ho humam,
ma haef-haef au umnau ho hanam.
Hit tmapaumák onlê masî ma utan,
me tmakloö onlê pah-pinan ma kfun.
Hit lo snasaf ma smanaf mesê kit,
tbait malinat ma susar es nok es.
Lobaithe Uisneno nfut kit piuta.

Yogyakarta, Funhitû 2003

Funan Atanâ


Nâko: Yohanes Manhitu

Fai i funne ka natból fa, meisökan.
In natetbon a-nbi pah kamahinê,
in ka nkios fa pah-pinan ameisökat.
Au ‘toko ‘mes he ‘soî lakat-lakat,
utuin lalan amaneot he utís salit.

Lo ‘tebes funne ka nasnekû nit fa,
me in a-nmani nbi nope in aonbian.
Lekâ lof in a-nnao nasaitan nope aëkâ
He ntanâ pah ameisökat, pah ametak?
Ó, funan atanâ, mkoenom-oum nai!

Yogyakarta, Funhitû 2003

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007