Thursday, August 29, 2019

Taim kuk he tamlilê


Tabu nhuil piuta, ka nasnás fa,
hit tasaitan oras neonmabê.
Ma hit taim kuk ka thae fa
he tapèn ma oket tamlilê.

Atuis: Yohanes Manhitu 

Noemuti, 29-08-2019

Foto: hiveminer.com

Tetus nâko neno-tunan


Ta'úb hit mepu ma banit tèki fnekan
ma salit alekot a-nbi nekak nanan.
Masi sutaise nmâfén ma nükan,
tetus natból nâko neno-tunan.

Atuis: Yohanes Manhitu
Noemuti, 24/08/2019

Foto: iqbalkautsar.com

Tuesday, July 30, 2019

Mauthe mlilê naheun nai


Ka ala fa natuin kanan sít ma puisi,
au he 'panat an ho kanam amasat.
Mauthe nbi kun au nekak apánlasi,
mlilê naheun nai ma njail akuasat.

Hanfuafin: Yohanes Manhitu

Yogyakarta, 13 Funhâ 2019

Foto: worldliteraturetoday.org

Noknokâ oras manse nsae


Haef namfau ben au 'haman ko
nbi noknokâ oras manse nsae
fun au 'loim kuk he utonan ko
ma au lof a-'pao tala mutae.

Atuis: Yohanes Manhitu

Yogyakarta, 12/4/2019

Foto: www.4usky.com

Sunday, June 30, 2019

Mufnekan he muah mumsén


Nbi tabu mé ho mhae ma mumnáh,
ho mufnekan he muah mumsén.
Mail, kolo natpén ma oket nah
masi in ka nâpai ma ka nsen!

Hanfuafin: Yohanes Manhitu

Yogyakarta, 11 Funhâ 2019

Foto: www.spark.adobe.com

Kanam amaste fê matekâ



Nmuî ekâ ma nakat es matak.
Me masi 'nuüf ma tasi naëkâ,
te nipu ntai ma nope nmetak,
ho kanam amaste fê matekâ.

Hanfuafin: Yohanes Manhitu
Yogyakarta, 7 Funhâ 2019

Foto: www.martinrak.cz

Friday, May 31, 2019

Onlê senat amliat


Kalu lo fê a-nmuî tabu ma bale,
neu, hit kaisâ tasnás he tafnekan.
Onlê senat amliat ok-okê abitin lele,
tamasab monit nâko haen tala 'nakan.

Hanfuafin: Yohanes Manhitu

Yogyakarta, 6 Funhâ 2002

Foto: www.videoblocks.com

Au umnau ko piuta



Neno naübon, atoni nasaitan tupas.
Kolo nkae ma nèk hanaf onlê opás.
Manse nbólen ma noknokâ namás.
Au umnau ko piuta; ho lo mumás.

Hanfuafin: Yohanes Manhitu

Yogyakarta, 5 Funhâ 2019

Foto: hdwallpaperfx.com

Tuesday, April 30, 2019

Tafnekan fuan aminonit

Foto: www.suluhtani.com

Onlê kolo ma manu lê nasaitan hau,
hit tasaitan halâ he tanaob monit
tèk sonet ma mepu namfafau,
ma tafnekan fuan aminonit.

Atuis: Yohanes Manhitu
Yogyakarta, 3-4-2019

Mumép he musòp lalan

Foto: libreshot.com

Mumép he musòp kum ho lalan
masi haef-haef manas ma ulan
onlê he naneuk nain ho fnekan.
Nekamtaus kaisâ a-njail aükan.

Hanfuafin: Yohanes Manhitu

Yogyakarta, 2 April 2019

Sunday, March 10, 2019

Tpanat lolek neu salit alekot

Foto: www.learning-mind.com

Kabiti napán laso amanenut,
meo nâkolô ini knusan aäiktin,
me hit atonîhonis a-tpanat lolek
ma tpake neu kanan salit alekot.


(Atuis: Yohanes Manhitu, 2019)

He hit paku npin, natuin Mahatma Gandhi

Foto: www.tommysimatupang.com
Ka nparlú fa he tfulak tís tuaf bian in paku he hit paku npin.
---Mahatma Gandhi, India in amaf nasional

Thursday, February 28, 2019

Apules Kamapules

Foto: https://strawberrytours.com


Atuis: Yohanes Manhitu

In nabeonon nak in atoes
ma atninas laismeûsinê.
In naüab nak in es solalus,
atitus neu sonaf amaneot.
Me, natuin funan in aän,
in apules sonaf kamapules;
in atuthaes ma ate neu pah
ma luan manas kamaliles.

Mnén, apules kamapules,
ka annek sonaf lê mapules!
Mufètin ma muskòtun kum
kanan lasi funan kamaliles!
Mnonâ ho ‘nimam he msai
sonaf lê naheun nok tetus!
Nane essonaf Usif Asoit
ma Asèfit smanaf amtaus.

Aí, benû, apules kamapules!
Enô sonaf mapules fê masoin,
Sulat lê naheun nok tuis neno
fê natfei neu mataf ma lukef.
Mnahat abalbalat ma tuakase
lê naheun nok halinat fê esan.
‘Tokô abít Usif amlilet in luan
fê masiap neu anaot ahaet.

Yogyakarta, Funfanû 2003

Teas

Foto: www.iconspng.com

Atuis: Yohanes Manhitu

O, hau klibû, hau atulun!

Hau atulas, hau kaäpehet.
Ho kamamatâ, me manekaf;
ho kamaäof, me mahinê ko.

‘Takaf ao’aölet eslê ho;
‘takaf ao amenat eslê ho.
Oras tuafe näo’oel, mateas.
Tabu tuafe he näî, nhuk teas.

Atoinmunif ka nloim fa teas;
mansian amnasit a-nhuk in teas.
Ho mfain haef abèït ma amaspètis,
ho mjail suki amepat ma amâtanes.

Yogyakarta, Funfanû 2003

Thursday, January 31, 2019

Hanaf Matâteme

Foto: http://amimakhter.blogspot.com

Atuis: Yohanes Manhitu

Anin fai nèk hanaf i

nâko siüf kamahinê
natuin kabâ malutâ.

Onlê atoin-amonot es
au utnín uab pah-fui
oras fai i fê nanesab.

Hanfuaf i ka ném fa
nâko BBC aî VOA;
nâko pah kamahinê.

Yogyakarta, Funnimâ 2004

Rosario Kamakrús

Foto: http://www.stmarymagdalenes.org

Atuis: Yohanes Manhitu

Rosario mesê namasab ní mesê. 

Mamoëk nâko haufuâ muitleko, 
ka tít fa fuaf mesê es aobiaf. 
Me kasian in ka nok fa krus. 

Rosario nèk nuän kninô mesê. 
Neu mauthe in etus kaisâ natfék. 
Rosario kamakrús, ka namás fa. 
In onlê sunî matapâ kamanesâ. 

Kupang–Timor, Funtenû 2004

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007