Nâko un-unû, au fêka ít fa niutnatê alekot aî museum amasat neu uab amates. Haefes uab-es a-nmaet nalail, in lof namneuk nabalbál ma in to(b)e lof nanekun in hanan, onlê kolkitâ lê nanekun nain in sailumat.
Tuesday, July 31, 2018
Au I Hanaf Mapaän Kau
Foto: www.google.com
Atuis-alulat: Yohanes Manhitu Nenô ma fai nhuilan onlê othaef, ka nasnasan, me au ûleltok, au ka ‘loim fa, sin es nâlelat kau. Hoè, au i ka labit kau fa; au ka matâteme kau fa. Au ka ufó fa. Au msâ ka ‘mânisib fa uisfeotnai. Nansâ es au luluk ma fefke nmânisin au toni? Neu mauthe manas ma funan es nahinen lasi.
Pahe in sufan ma kaün onlê napnikan kau ben fun limat ma masaf moderen naheun sin lulkin ma pankatoli nahonis laisfuaf neno-tnanaf âloö. Sonaf laishine ma ‘noinâ nasaitan nono nek’uab, atenab ameûsinet sin masit napnikan au masak. Au ‘fain onlê apaokuan kamakisô, kamasian.
Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.
Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.
Neu abaca ok-okê, au uteab Kit "Tkoenoktém teu Blog Uab Metô!" Tabê taetuis neu Kit! Aim he tateab hit tenab tèk nekmânafâ ma tasoin nekak tèk sinmakat amonit piuta. Mauthe lasi namlia ma toni nasúf, ma namuin nafua ma naheun pah-pinan amanuat. Uamnanû neu hit uab Metô, molok amasat Pah Timor ini lê matutan nâko batan neu batan ma nfomèn nabala onlê haumenî, hau makanâ!
No comments:
Post a Comment