'NUÜF SUMBING IN HUMAN

Foto: Yohanes Manhitu (2026)

Atuis/alulat: Yohanes Manhitu

Nâko bale alekot ma amasat i,
'nuüf amnanut-es in humne
lo nmeu kalu nipu ka nakini.
Lê nane 'Nuüf Sumbing ini.

Silancur, 5 Funhitù 2026

Kuatren Metô-Labit-Esperanto: "Mlak Mutuin Humone" (Melangkah Lewat Padang Rumput)

Foto: istockphoto.com

MLAK MUTUIN HUMONE

Ho mutból òm ma ho mnao baun-baun,
mlak mutuin humone amanuat amliat,
kumanit naheun ho humam ama'èkit.
Hausufâ lê ho mèki, kaisâ namafun!

Atuis/alulat: Yohanes Manhitu
Yogyakarta, 5 Funboës 2015
-------------------------------

MELANGKAH LEWAT PADANG RUMPUT

Kau muncul kemari dengan berjalan perlahan-lahan,
melangkah lewat padang rumput luas nan subur,
senyuman memenuhi wajahmu nan mulus.
Bunga yang kaubawa, jangan beracun!
-------------------------------

PAŜANTE TRA LA HERBEJO

Vi aperas ĉi tien marŝante malrapide,
paŝante tra la fekunda vasta herbejo,
rideto plene aperas sur via glata vizaĝo.
La floro, kiun vi alportas, ne estu venena!

Versi Indonesia & Esperanto:
Yohanes Manhitu (penulis)
Ungaran, 04-04-2026

Kuatren Metô-Labit-Esperanto: "Nefo Amanuat abít Tuntang" (Labit: Danau yang Luas di Tuntang)

Foto: Yohanes Manhitu (Kafe Bistora, Tuntang, 03/05/2026)

NEFO AMANUAT ABÍT TUNTANG

Nâko Tuntang tala Bukit Cinta,
nmuî nefo amanuat onlê tasi.
In kanne eslê Rawa Pening.
'Nuüf Telomoyo es matak.

Atuis: Yohanes Manhitu
Tuntang, 3 Funnimâ 2026
--------------------------------

DANAU YANG LUAS DI TUNTANG

Dari Tuntang hingga Bukit Cinta,
terdapat danau luas seperti laut.
Namanya adalah Rawa Pening.
Gunung Telomoyo ada di mata.
---------------------------------

VASTA LAGO EN TUNTANG

De Tuntang ĝis Bukit Cinta,
troviĝas vasta lago kiel maro.
Ĝia nomo estas Rawa Pening.
Mont’ Telomoyo antaŭ la okuloj.

Versi Indonesia & Esperanto
Atuis: Yohanes Manhitu
Ungaran, 03-05-2026

Kuatren Metô-Labit-Esperanto: "Taskól Nane Hit Hak" (Labit: Bersekolah Adalah Hak Kita)

Foto: kompasiana.com

TASKÓL NANE HIT HAK

Tuaf es-es a-nmuî hak he naskól
ma nsimo ‘noinâ he nmuî hine.
Hit a-tmuî bukae suk fun taskól,
ma hine musti nanés onlê ane.

Atuis: Yohanes Manhitu
Ungaran, 02 Funnimâ 2026
-------------------------------

BERSEKOLAH ADALAH HAK KITA

Setiap orang punya hak untuk bersekolah
dan menerima pengajaran agar berilmu.
Kita berbekal cukup karena bersekolah,
dan ilmu harus bernas laksana padi.
-------------------------------

LERNADO ESTAS NIA RAJTO

Ĉiu homo rajtas viziti lernejon
kaj ricevi instruadon por akiri scion.
Ni havas sufiĉan provizon pro lernado,
kaj scio devas esti plena kiel spiko de rizo.

Versi Indonesia & Esperanto
Atuis: Yohanes Manhitu
Ungaran, 02-05-2026

Kuatren Metô-Labit-Esperanto: "Neno ‘Naek neu Ameput" (Labit: Hari Besar untuk Pekerja)

Foto: www.bola.com

NENO ‘NAEK NEU AMEPUT

Neno i, nbi bale-bale nbi pah-pinan,
hit tamnau neno ‘naek neu ameput.
Henait monit i maüpâ, musti tmeup
ma ta’úp ameput es-es ma in haet.

Atuis: Yohanes Manhitu
Ungaran, 01 Funnimâ 2026
-------------------------------

HARI BESAR UNTUK PEKERJA

Hari ini, di setiap tempat di dunia,
kita peringati hari besar ‘tuk pekerja.
Agar hidup ini bernilai, kita mesti bekerja
dan menghargai setiap pekerja dan jasanya.
-------------------------------

GRANDA TAGO POR LABORISTOJ

Hodiaŭ en ĉiu loko tra la mondo,
ni festas grandan tagon por laboristoj.
Por ke la vivo havu valoron, ni devas labori
kaj aprezi ĉiun laboriston kaj ties servojn.

Versi Indonesia & Esperanto
Penulis: Yohanes Manhitu
Ungaran, 01-05-2026

Kuatren Metô-Labit-Esperanto: "Neno I Funhâ’e Msòpun" (Labit: Hari Ini Penghujung April)

Foto: https://pranala.co

NENO I FUNHÂ’E MSÒPUN

Neno bôteun naheun mansiane monit
ma njali ‘takaf nak tabu lo maüpâ kun.
Hit tahín tak neno i Funhâ’e msòpun,
ma hit fê taötab kuk monit tèk banit.

Atuis: Yohanes Manhitu
Ungaran, 30 Funhâ 2026
-------------------------------

HARI INI PENGHUJUNG APRIL

Tiga puluh hari mengisi kehidupan manusia
dan menjadi tanda, waktu memang berharga.
Kita tahu bahwa hari inilah penghujung April,
dan kita masih memaknai hidup dengan karya.
-------------------------------

HODIAŬ ESTAS LA FINO DE APRILO

Tridek tagoj plenigas homan vivon
kaj estas signo, ke tempo ja valoras.
Ni scias, ke hodiaŭ estas la fino de aprilo,
kaj ni ankoraŭ donas sencon al l’ vivo per laboro.

Versi Indonesia & Esperanto
Atuis: Yohanes Manhitu
Ungaran, 30-04-2026

Kuatren Metô-Labit-Esperanto: "Foknaise Fêka Nemantea" (Musim Kemarau Belum Tiba)

FOKNAISE FÊKA NEMANTEA

Ulne fê a-nmòf masi ka npoip fa tala tabu mnanû.
Manse nhoi, me nope nabè’ naskék nabua.
Hit tahín tak foknaise fêka nemantea.
Me hit tafnekne piut onlê unû.

Atuis: Yohanes Manhitu
Ungaran, 29 Funhâ 2026
-------------------------------

MUSIM KEMARAU BELUM TIBA

Hujan masih turun walau tak mengguyur berjam-jam.
Matahari terik, tapi awan bisa tiba-tiba berhimpun.
Kita tahu bahwa musim kemarau belum tiba.
Tapi ia tetap kita harapkan seperti dulu.
-------------------------------

LA SEKSEZONO ANKORAŬ NE ALVENIS

La pluvo ankoraŭ falas, kvankam ĝi ne daŭras horojn.
La suno varmas, sed nuboj povas subite kolektiĝi.
Ni scias, ke la seksezono ankoraŭ ne alvenis.
Sed je ĝi ni ankoraŭ esperas kiel antaŭe.

Versi Indonesia & Esperanto

Atuis: Yohanes Manhitu
Ungaran, 29-04-2026

Kuatren Metô-Labit-Esperanto: "Alakun Ho, Usî" (Labit: Hanya Dikau, Tuhan)

Foto: unsplash.com

ALAKUN HO, USÎ

Au he ufnekan eu sekau, Usî,
kalu kanan alekot alakun Ho?
Au he aen eu sekau ntèn, ò Usî,
kalu apanat amaneot alakun Ho?

Atuis: Yohanes Manhitu

Yogyakarta, 10 Funsiô 2012
------------------------------

HANYA DIKAU, TUHAN

Kepada siapa ku ‘kan berharap, Tuhan,
jika segala yang baik hanya Dikau?
Kepada siapa lagi ku ‘kan berlari, ya Tuhan,
bila pemelihara yang baik hanya Dikau?
-------------------------------

NUR VI, SINJORO

Al kiu mi esperos, Sinjoro,
se la tuta bono estas nur Vi?
Al kiu alie mi kuros, ho Sinjoro,
se la bongardanto estas nur Vi?

Versi Indonesia & Esperanto

Atuis: Yohanes Manhitu
Yogyakarta, 09-11-2016

HO MHAUMÁK BAUN-BAUN

Atuis: Elena Liliana Popescu

I

Mail, moê’alekot-es a-ntèn
matamba ben a-nbi neno i
neu ho simot aî laiskahinet.

Ho ka muhín fa, ho ka mloim fa
he maim lalan he nabè’ muhín
mak ho ka muhín fa sâ-sâ a-ntomneu ko.

Sâ-sâ lê naklimâ nâko
laispalsumâ ataulnekaf
nane nnao ben es mé?
Fomenî apaisâ nâko luman
nane oras i es mé?

Ho mhaumák baun-baun, Aokbian,
meu hine
ntomneu ho laiskahinet!


II

Ho mumnau ka
ho fai pukan lê ka nok fa tupas
a-nbi neno unû,
oras pinamtas’e nhaumák
ma ho mumtau
mak sâ lê ho muneöp nane
eslê ho laiskahinet?

Ho mhaumák baun-baun
mhaumáken ma mhaumák a-mnès
meu pinamtas’e nbi noknokâ amaneot,
oras fai kaätuäs lê ka nok tupas nane namsòp
nok baelpenet ahaeb nekaf...

Laiskahinte feësat natonon
ma nabè’i ntaul nekaf ‘tebes
he nhuk natám ko neu in tifkai
nbi tonnatun-natun laiskahinet ini...

Laiskahinte
feësat a-npaisâ
es ho ka nabè’ fa mít
in kamanenun lê namfau ‘sekê
ma ka nabè’ fa muhín mak in ala santuaf...


III

Mapilû on uisbifé neu ilusi,
in namép
a-nbi tabu ho fê
mûnâte kuasa nane.

Ho mutoit mûfain’omen ka
neu lê nane alahe sekau,
fun in nahín ho lasîkolô ok-okê,
ho nukat ok-okê,
ho lomit abít nanait ok-okê,
ma ntaul ho nekam
neu ba he ho mjail in ate nekbaun?
Kalu ka muhín, neu muhín nai mak in tabu lof a-ntea
lekâ ho hantotis asuseb nekaf-sin nane
lof a-njalin baelpenet insomnia
nâko tuafin lê a-nlomin he nahinen—
insomnia lê ‘tebes lof ném—
neu sekau lê naim
ka nasnás fa
lalan he nfain neu ume.


IV

Ho mhaumák baun-baun, Anmone, mok kamafukal
ma, feës-feës, haumakat nane
namenab nís nekaf...
In natón ho neknuâ ok-okê,
ho sutais ok-okê,
ma ho neksusar nabè’ nâmaet ko.

Kaisâ mumtau, nane ka neu ko fa,
ho taüm amaneot, me neu in
lê ho muneôpe onlê ho kum,
in lê ho mpès-mutaube
haefe natun-natun a-nbi neno mesê,
in lê ho musáne haefe nifun-nifun,
he mfene maäf haefe nifun boës ma nnès
a-nbi tabu es-es.


V

Ò, ‘tebes ho mloim he muhín
sâ lê nabè’ nanát ko he mtea nae,
mbi nae ho ka muhín fa mak ho mbin!...

Lo ‘tebes ho lof a-mnao meu nae,
me ho lof mumtausan mleü
lê nabuabon nâko mleü
an-anâ miliare namfafau,
lê natnú’ ko nbi lakat-lakat.

Ka nalekonès fa ka he muhín
mak in nabia ko nanoeba,
ma he msimo on ho
abiat anaolalan?


VI

Ho mumtau fun
ho nabè’ munekun
ho hak neu laiskahinet,
ma ho alakleö he mumaun
fun luman lê ka nabè’ malukis,
lê masit ho lof a-mteke mak slutuf
a-nbi ho tabu es-es lê nalekonès...

Slutuf nâko moët humâ-humâ
a-nhel ko onlê magnet.
Me, masi onnane msâ,
a-nbi ho fuam nanan nae,
nmuî dame...

Ma dame nane ntanús nan ko
nèk in simfoni mnesamnés,
feës-feës,
haef-haef,
nabalbál...


VII

Ho mhaumák baun-baun mok noe
“He muhín aî he ka muhín”.

Ho msiap ka he mlake?
In nahakâtaun!...

In a-nsai es ho matam
lê natfai manuan,
me fêka nabè’ nít.


VIII

Ho mhaumák baun-baun
mok totis ânaet, Anmone!...
Ho msiap ka he muhín in taes?

Sâ lê naëkâ ko he mu’ét,
mèk lalan paradoks, masit nane
sâ lê nabè’i ntulun ko he míte...

Ho msiap ka he mnao mfin?
Aî masit he mhaumák a-mnès, sekau nahín?

Ho mutuin aî ka mutuin fa
moët he muleün patung-sin
lê a-npules ho ‘lekom/mleüm?

Sin lê nane lof namleün nmesen
oras ho fê nabè’i mmoë mtèn bian,
lê namnesan ka nmuïn fa upan,
natuin ho lomit kamâsekê.


IX

Ho mhaumák baun-baun mok kamafukal,
ma sâ-sâ lê a-nhaek ma naëkâ ho lalan
lof ka nmae fa he npaek humaf-humaf
lê nèk lais’amun maneunleüf!

Ma feës-feës—
masi kaiskaisâ a-nbi oras nane
ho mailat sin he npaisâ ko—
sin lof a-nsobal humâ-humâ
he nasnasab ko nbi lalan...


X

Ho mhaumák baun-baun
mok kamafukal amanenut, Anmone!

Masit ho lof mumtausan lalan,
lê a-mbi nae lof a-mmés baun-baun...


XI

Sâ lê ho mak-on nabè’ nasnasab ko,
lê ho mailet onlê namép lekleok,
natuin maneone, in alaha ilusi,
mutoit mûfain’om, “Nane sâ?”

Ho mhaumák baun-baun,
mleü msâ nânae baun-baun
fun helnekaf lê kamabatas
nâko nuansa lê ka ‘tebes,
lê nabè’ nâbaun ho lakat
kalu ho kum
ka mumép fa suk.


XII

Ho mhaumák baun-baun mok sâ lê...
Ho msiap ka?


Atlakab neu Metô: Yohanes Manhitu