Au Sekau Kau?

Foto: https://theexplanation.com

Atuis: Yohanes Manhitu

Au i pakaet nâko Apakaet Amaneot;
au i sufâ nâko Asufat Abalbalat;
au i humaf nâko Humaf Aklahat;
au i snanaf nâko Snanaf Afémonit;
au i amonit nâko Amonib kanan amonit;
au i atuthaes nâko Alulut neu lalan amaneot;
au i asanab lê nafnekan Asoisanat Amanekat;
au i afnekan neu mlilê pah-pinan ma firdaus;
au i ate neu Usif Amanekat ma Afé’ampun;
au i askolat nâko Guru neu kanan guru;
au i asonlait neu Bahfatu Amepat;
au i domba nâko Atukus Amaneot;
au i amninut nâko Oematâ Kaämètis.
Au i mansian, lo mansian, me Ho msian!

Yogyakarta, Funboës 2003

Onen Seunbanit neu Ko

Foto: https://www.schoolswork.co.uk

Atuis: Yohanes Manhitu

Usî, Amanekat ma Amnaut Ko,
Afémonit amaneot ma Atitus Ko!
Neno mnaë nfin ma namneaën,
neno feü es nemantea ben, Usî.

Ó, Usî Akuasat ma Akubelan,
au he uteab seunbanit neu Ko,
natuin Ho es au atitus ma apanat.
Au, Ho ate kau, fê upèn taubsonâ
he ít manse nsae nbi neon-feü i.

Amuït kanan atuas pah-pinan i;
Usif nâko kanan usif naijafafô i
mpanat ma mpaloil au monit piuta
henait au paku kaisâ a-nmaet nít.

Usî, Alekat ma Afekat Amaneot,
au ‘toit ma ‘sanaen Ko, au apakaet,
he mfai kau enô mlilê ma meûsinê
lê au ami ma ufnekan he ‘pules Ko.
Usî, mhaumakab kau neu Ho hine.

Afémlilê ma afémonit amasat kum,
‘mmoêfa au monit he naheun halinat
lê nabè' mabatî neu au aokbiakin,
he hai ok-okê mipèn halinat neno.

Yogyakarta, Funfanû 2003

Taim ma taim kuk he tít

Foto: https://walkingdordogne.com

Tabu natpén ma nasaitan kit;
nenô ma fai nmaseklin piuta.
Hit fê taim ma taim kuk he tít
mlilê nbi kuan ma nbi kota.

Atuis: Yohanes Manhitu

Yogyakarta, 30/11/'20

Mpanat sâ lê mafnekan

Foto: https://libreshot.com

Ka haef mesê fa ho mufnekan

he mupèn kum sâ lê ho mlomi.
Ho mpanat leko sâ lê mafnekan
he kaisâ namneuk ma ho mami.

Atuis: Yohanes Manhitu, 2020

Hit tanaob mepu

Foto: https://www.industry.co.id

Ka nmuî fa fai lê ka nahunun nenô.

Nbi neno mnanû, hit tanaob mepu.

Onlê tune nbi 'hosô aî a-nbi 'nonô,

Hit a-tmeup he kaisâ  a-tjail teku.

Atuis: Yohanes Manhitu, 2020

Tafnekan ala malinat

Foto: https://www.lovethispic.com

Neno mesê naheun nok halinat,

Sâ-sâ lê ném naleok ma namás.

Hit nuakit tafnekan ala malinat. 

Teu monit feü, hit taim tamas. 

Atuis: Yohanes Manhitu, 2020

Fun in fêka nasnás

Foto: https://www.stocksy.com

Haef-haef, hit tapén pahe manuan
ma tak sâ-sâ lo naleok ma namás.
Ma kalu nekak i fêka nmuî in tuan,
hit a-tlak piuta fun in fêka nasnás.

(Atuis: Yohanes Manhitu, 30/9/'20)

Mauthe fai alekot lê i nfin kun

Foto: www.tomswallpapers.com

Kalu ka ít an ko he utonan ko,
kalu ka u'èuk an ko he 'hosén ko,
neu mauthe fai alekot lê i nfin kun,
ma mauthe tabu amasat i mapnikan.

(Atuis: Yohanes Manhitu, 30/9/2020)

Gitanjali 08

Foto: https://shop.alighieri.co.uk

Nâko: Rabindranath Tagore

Liänâ lê atoni natai je nèk naimnuke in aptais ma naïun taindanus a-nbi 

neone ka nlomi ntèn fa ben he nâbaë; in aptaise naëkâ in lakat ok-okê.

Fun namtau kaiskais â aptaise nok fukat, aî afuskuk’e ntoman, 

in a-nhelson kun nâko pah-pinan, ma namtau, ekna he nâbeok’on.

Ainâ, ho aptais alekot ahâmuït nane ka nmuî fa upan,
kalu in a-nmoê tuafes nâlón afuskukû afé-aominâ pahpinan
ini; kalu in naneuk hak tamas-es neu fesat

a-‘naek a-nbi mansiane in monit biasa.

Tlakab neu uab Metô: Yohanes Manhitu

Gitanjali 04

Foto: https://www.healingenergytools.com

Nâko: Rabindranath Tagore

Au monit in úne ko, au musti ‘panat au aoke he nmeu
fun uhín ak ho mleô piuta mupunan au aoke in tunan.

Au musti ‘sobal he ‘polin kanan lasîmoe nâko au neöp
fun uhín ak ho es amaneot lê a-nmeûsineb au nekak
nèk tenab-alekot.

Au musti ‘sobal he ‘liû upoin kanan amleüt nâko au
nekak ma ‘panat au manekte he nasúf fun uhín ak ho
mutetbom es au nekak in kòpun akninôsekê nae.

Ma au musti ‘sobal mâtanê he ulilê ko nbi au moët fun
uhín ak ho maneunme es a-nfe kau mâtanê he ‘moê.

Tlakab neu uab Metô: Yohanes Manhitu

Gitanjali 26

Foto: https://priscillahernandez.com

Nâko: Rabindranath Tagore

In némen ma ntoko nbi au bnapak, me au ka ‘fen fa.

Nane lo tupas kamalomîsekê, ò kasian neu kau!

In nemantea nok oras fê fai; in harpa nbi ini ‘niman, ma

au nanaitin nâtaïn natuin in melodi-sin.

Adú, nansâ es au ufín ain fai ok-okê? Ah, nansâ es au

unekun ain in etas lê ini snasne ntoman au tupas?

Tlakab neu uab Metô: Yohanes Manhitu

‘Bainâ Cuaca

Foto: https://www.greeners.co

Atuis: Dennis Ávila

Nmuî usaf mesê abít meo uf lê a-nmoê pahasnaenin.

Baun-baun, thonos nane nsaun,
keän neu mesin nane ‘nû’ai.

‘Nuäf in baris nabia neno haen,
ma nbi fai in kunin nanan
neno napoin fkunin.

Meteorit-es naslutub hau-amointin.
Ma nmoê oe abít nifu-nifu naslút.
Terate-sin es napasib oe.

Sâ-sâ ok-okê na’ík nisin;
ma nbi ‘sasai nmuï ‘heo matel,
lê meûleko ma in nonô nua.

Nbi bale lê èse fê a-ntoeb nane
beruang kutup-sin ma âmaetsin a-nmaliün,
he nakekob nan rasa mnahas.

Naskék nane eslê in isbait:
kristal-sin namnán he onlê feün,
mâfén’amnesat naim papâ
ma ka naim kun fa fiki.

Uisneonpal’in ka nlaim fa aokin
onlê jaguar-sin
nbi sin tabu snasat.

Planet i nsutai menas a-nbi lakat-lakat.
Nmuî meo ufes es in monit neno-neno in usan.

Atlakab neu uab Metô: Yohanes Manhitu
Yogyakarta, 15 Funhitû 2020

Buku Laistoes Fauk lê Matuï nèk Uab Metô

Etas Kleö ntomneu Uab Metô nèk Uab Esperanto

Hit fê tafnekan

Foto: photorator.com

Onlê amakisot lê némen,
Funnê'e lo nhaman kiten.
Hit es kit i ma fê tafnekan
he menas i nasòp in ukan.

Atuis: Yohanes Manhitu
Noemuti, 31/05/2020

Kalu

Foto: https://www.witn.com

Atuis: Elena Liliana Popescu

Kalu haefes ho nabè’

msû sâ lê kamasuäk,

mutám sâ lê ka nok tuän

ma, mlak mutuin luman,

ka mjail fa es nâko nuasin...

Kalu haefes ho nabè’

mjail manekat masi ka mnek,

mjail fnekan masi ka mufnekan,

mjail molok masi ka mumolok,

mjail neöp masi ka muneöp…

Kalu haefes ho nabè’

mnen sâ lê kamanenâ

mu’ét sâ lê kamaëtâ,

ma mûnoinâ sâ lê kamahinê,

moët feü es lof naübon ka?

Atlakab neu uab Metô: Yohanes Manhitu
Judul asli (nèk uab Rumanias): Dacă

TAPÉN TÍT KOLTEME

Foto: www.pinterest.com

Neno-neno tabala ume,
ka tnao fa fê teu mé-mé.
Haefes tapén tít kolteme,
tak in monit es nok dame.

Atuis: Yohanes Manhitu
Yogyakarta, 30-04-2020

KORONA KA NAHÍN FA ULAN

Foto: www.wallpaperup.com

Funhâ'e lo he namsòpen

ma fun-feü he na'úb lalan.
Ulne msâ onlê he nasónen,
me korona ka nahín fa ulan.

Atuis: Yohanes Manhitu
Yogyakarta, 30-04-2020

Gitanjali 26, Nâko: Rabindranath Tagore; Atlakab neu Uab Metô: Yohanes Manhitu

Foto: https://www.visitberlin.de

Atuis: Rabindranath Tagore

In némen ma ntoko nbi au bnapak, me au ka ‘fen fa.

Nane lo tupas kamalomîsekê, ò kasian neu kau!

In nemantea nok oras fê fai; in harpa nbi ini ‘niman, ma

au nanaitin nâtaïn natuin in melodi-sin.

Adú, nansâ es au ufín ain fai ok-okê? Ah, nansâ es au

unekun ain in etas lê ini snasne ntoman au tupas?

Yohanes Manhitu es natlakab neu uab Metô, ma tlakab in npoi es buku Gitanjali (Sítnatas) (Yogyakarta: Diandra Kreatif, Funnimâ 2019).

Gitanjali 2, Nâko: Rabindranath Tagore; Atlakab neu Uab Metô: Yohanes Manhitu

Foto: https://www.southwestmag.com

Atuis: Rabindranath Tagore

Nbi tabu ho muplén kau he ‘sí, au ansaoke onlê he natkauf nèk nekpules; oket au ‘baiseun eu ho humam, ma núbe naheun au matak.

Sâ-sâ kaäma’èkit ma kaälumat a-nbi au monit nabuabon neu hanlumat amastes—ma au mòfhaete nâbén in ninen onlê kolo amlilet lê natpén ma nlak tasi.

Au uhín ak ho msinmakan au sít. Au uhín ak ala on asít, au nabè’i ‘tean ho matam. 

Èk au síte in ninen amanuate niün, au ‘leô ho haem, lê unû au ka nabè’ fa ntean.

Fun a-mlilê nâko sít nane namauf kau, au upnikan au i sekau kau, ma au oën ko ak sobâ, ho lê au usî ko.

Yohanes Manhitu es natlakab neu uab Metô, ma tlakab in npoi es buku Gitanjali (Sítnatas) (Yogyakarta: Diandra Kreatif, Funnimâ 2019).

Kalu ho mtean kum ho fuam

Foto: https://desirejesus.com

Atuis: Elena Liliana Popescu

Kalu ho mtean kum lê kamafukal,
ho nabè’i mbol on tuaf biasa aî mâneät.
Ho, ‘tebtebes, lo ka mafukal ko fa.

Kalu ho mtean kum nekbaun,
ho nabè’i mbol on tuaf nekbaun aî amaunû.
Ho, ‘tebtebes, lo nekbaun ko.

Kalu ho mtean kum kaäslutus,
ho nabè’i mbol on tuaf a’ét aî amalètis.
Ho, ‘tebtebes, lo mnesamnés ko.

Kalu ho mtean kum mâfén’amnesat,
ho nabè’i mbol on tuaf nekmânafâ aî aneöt.
Ho, ‘tebtebes, lo ka muneô kum fa.

Kalu ho mtean kum ho fuam,
ho nabè’i mbol on tuafes aî tuaf bian.
Ho, ‘tebtebes, lo ho fuame kun.

Atlakab neu uab Metô: Yohanes Manhitu
Judul asli (nèk uab Rumanias): Dacă ajungi la tine
Noemuti, Timor, 21 Funboësamnuâ 2019

Nbi ho nekam nanan

Foto: https://www.christianity.com

Atuis: Elena Liliana Popescu

Nbi tabu es-es,

pah mesê a-nïsbai

ma bian lof natból...

Ho mjail saksi piuta

neu kanan teünbainâ

nâko pah nok lisaf nua.

Musoinom kum nai

henait nabè’ mupèn

sâ lê maparlú’.

Ho tninsamnitse ntamba

nâko tabu es neu tabu bian,

he in nabè’i njail mesê nok ko.

Maim lê mâtanê nane

lê a-npanat ko

he mmoin.

In lê oras i

nok ko piuta

nbi nekam nanan.

Atlakab neu uab Metô: Yohanes Manhitu
Judul asli (nèk uab Rumanias): În inima ta
Noemuti, Timor, 21 Funboësamnuâ 2019

Ka nmuî neöp

Foto: https://finallyunchained.blog

Atuis: Elena Liliana Popescu

Ka nmuî neöp, okî,
nane otaf amaneot, onlê tasi,
lê ka nsoe fa
nâko in kun, a-nbi oras teünbainâ
nâko pah-pinan lê mamnitâ
– nbi sekal lê a-njail laba –
nabain’on ma nfain kun okî,
lê malekamnanî he namneuk
lekâ pah-pinan ka nbine fa...

Ka nmuî neöp, tasi
nmèt kun a-nbi in nanan, naëbon,
npanat in otan amaneote piuta
nâko ‘punun lê ka nasnás fa
– mâkolô nâko hit lisak, fun
funne meûsinen nakini –
nbi ini ‘koton biru,
namneuk, nbi luman
nbi pah-pinan humhuman.

Ka nmuî neöp, monit
natau nan sâ-sâ lê
es mèsökne nanan
aî es mataus akninô:
neöt masi ka nmuî aneöt
– tëles neu abalbabte nanan –
teünbainâ humaf neno-tunan,
natuin tuafin lê nnoen nanin
a-nbi sin es-es in lisne kun.

Atlakab neu uab Metô: Yohanes Manhitu
Judul asli (nèk uab Rumanias): Fără de gânduri 
Noemuti, Timor, 21 Funboësamnuâ 2019

Oras haunatún tabu i

Foto: http://navigatingtheheart.com

Atuis: Elena Liliana Popescu

Oras haunatún,
oras manikin ini ‘taïn ala kleö es matninâ
a-nbi ho snasam,
maputû amuînekleko
ma foknaise ini ‘kotkin lê a-nmataun
– lê fê a-njalin fini –
npoin nbi neöp neon’amaï
nbi manas neonmabê in malulen...
Oras haunoönatkua msâ a-nbin,
nok in fomènin lê humâ-humâ,
me oras haunatún
abít ho nanam
– oras haunatún tabu i –
ka malukis fa nèk hanfuaf.

Atlakab neu uab Metô: Yohanes Manhitu
Judul asli (nèk uab Rumanias): Primăvara acestei clipe
Noemuti, Timor, 21 Funboësamnuâ 2019