Monday, April 30, 2012

Au ‘Lel ma Utô


Nâko: Yohanes Manhitu

Au utnínat au ‘lel ma utoän monit i.
Au ka uhín fa lekâ monit lof masenû.
Au ufnekan monit amlilet, kamasusar.
Monit mafnekan, naheun susu ma oni.
Monit lê naheun nok Uisneno tetus.

Neonhâ fê masekâ neik Neonnimâ.
Au ufeitin neno mnâ eik lelat ma toäs.
Au musti ‘fen kuk ûko monit ameisökat.
‘Fen ma ‘nao he ‘seun meûsinê amaneot.
Au musti ‘moin piuta he ‘pules Apakaet.

Yogyakarta, Funsiô 2003

2 comments:

anak timor sejati said...

Kase...kalu nabe' au he posting hit blog le i nbi au situs pah tuan. au situs es le www.aklahat.com

Yohanes Manhitu said...

Naleok, Kase. Ilolamu kaisâ tsekal tuise in ortografi (ejaän) ma ka tapnikan fa he ttek atuise kanan ma tuise in sumber, lo onlê biasa. Tabê ma pules,

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007