Friday, March 31, 2017

HO MPAO SEKAU?

Foto: https://www.wallpaperflare.com


Atuis: Yohanes Manhitu

Oras manse he nmòfen
ma oni nasaitan hausufâ,
kolo naim bale he ntúpen,
ho mupén bnaotasi anaot
fê nasaitan bnaosonlain.

Ho mhaek es tasi-ninen
mbi oe ma metô tnankin
onlê anaolalan nekamneku
nbi pah-hufui amanuat-es.
Ho mpao sekau, bifé?

Yogyakarta, Funhâ 2007
Posted by at No comments:

MAIKAN PULES NÂKO LASO



Foto: www.google.com

Atuis: Yohanes Manhitu

Hanfuaf aminonit lê matekâ namlileb
ma natua ansaof, namasab nanait.
Me laso lê a-nsai natuin hanfuaf
lof nanát ko neu mafu askekeb.

Atoin’ahinet nahín hanfuafe fón
masi maämû lekleok nèk manit
ma oket manonâ nèk laismahoet.
Maikan pules nâko laso lê maselô.

Yogyakarta, Funnimâ 2007
Posted by at No comments:
Subscribe to: Posts (Atom)

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu
ymanhitu@gmail.com

Yogyakarta, 14 Funboësamnuâ 2007