Nâko un-unû, au fêka ít fa niutnatê alekot aî museum amasat neu uab amates. Haefes uab-es a-nmaet nalail, in lof namneuk nabalbál ma in to(b)e lof nanekun in hanan, onlê kolkitâ lê nanekun nain in sailumat.
Tuesday, March 31, 2015
Kaäsaitan Mepu
Atuis: Yohanes Manhitu Manse nabaiksonen a-nbi neno i oras Funtenû ném ma nhosén kau onlê amakisot nâko pah kamahinê lê namkakab kau nèk in etus feü. Manse ka nmapút fa nbi neno i, feësat ulkapi ntoman hun amliat lê matel fun in niun nan oe ulan -- oe apopit lê naneuk nain afuskukû. Manse fê natón human a-nbi neno i, masi nbi bale bian nipu ntanús nane, masi nbi kota 'naek in ka mamnitâ fa fun uemfatu mnanû nakín nan matak. Manse nmakios piuta talantea neno i, ma ka nasaitan nít fa mepu nenbes onlê amakoet lê ka nasaitan banit masi sâ-sâ onhe naëkâ in lalan. Manse lof nasaitan kit neno i me ala leku fauk in he nhelon he natutan mepu nbi pisâ bian. In a-nmeup nabala me naëbon. Berbah, Yogyakarta, 2 Funtenû 2015
Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.
Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.
Neu abaca ok-okê, au uteab Kit "Tkoenoktém teu Blog Uab Metô!" Tabê taetuis neu Kit! Aim he tateab hit tenab tèk nekmânafâ ma tasoin nekak tèk sinmakat amonit piuta. Mauthe lasi namlia ma toni nasúf, ma namuin nafua ma naheun pah-pinan amanuat. Uamnanû neu hit uab Metô, molok amasat Pah Timor ini lê matutan nâko batan neu batan ma nfomèn nabala onlê haumenî, hau makanâ!
No comments:
Post a Comment