Au ‘Lel ma Utô

Nâko: Yohanes Manhitu

Au utnínat au ‘lel ma utoän monit i.

Au ka uhín fa lekâ monit lof masenû.

Au ufnekan monit amlilet, kamasusar.

Monit mafnekan, naheun susu ma oni.

Monit lê naheun nok Uisneno tetus.

Neonhâ fê masekâ neik Neonnimâ.

Au ufeitin neno mnâ eik lelat ma toäs.

Au musti ‘fen kuk ûko monit ameisökat.

‘Fen ma ‘nao he ‘seun meûsinê amaneot.

Au musti ‘moin piuta he ‘pules Apakaet.

Yogyakarta, Funsiô 2003

Via Dolorosa

Nâko: Yohanes Manhitu

Ó, Via Dolorosa, lalan neu nukat ma kanbait!

Ho es lalan kamapnikan talantea nabalbal.

Biâ, Benû manekat, Ecce Homo, Ecce Homo!

Mkios Mansian, Mkios Mansian! In nasusbon.

In a-nsutai ma natnín menas, maufinu nbi lalan i

he nsoi ma nseif kit, asanab, nâko sanat ma penu.

Neno nane, Kota Yerusalem a-nfain saksi amonot;

Via Dolorosa njail kun lalan alulut neu meisökan

masi meisökan nane lof masekâ neik meûsinê

natuin Aipinâ Amaneot nakalab meisökan.

Mfai ho nekam neu Meûsinê nane, Biâ!

Msiomfa Pinâ Amaneot nane, Benû!

Via Dolorosa, lalan malinat, msâ susar.

In es hit matak ma hit monit neno-neno;

in es lalan abalbalat neu kanan amonit kit.

Kaisâ musaitan lalan i onlê atoin-amtaus.

Mufnekan malinat amnemat amunit kun.

Susar lof ka npes neik ko fa onlê oe tasi,

ma nukat lof ka nout nís ko fa onlê ai.

Manas lof natból ma ntanâ kit piuta

nbi tabu meisökan nasaitan kit-en.

Yogyakarta, Funboës 2003

---

[1] Via Dolorosa nâko uab Latín, nak Lalan Susar aî Lanan Susal.

[2] Ecce Homo nâko uab Latín, nak Mkios Mansian aî Mu’ét Atoni i.

Atifkai-mansian

Nâko: Yohanes Manhitu

                              

“Aim, mituin Kau,

        ma Au lof a-‘moê kei

             on atifkai-mansian.” (Mat. 4:19)

Usif amaneot a-nhake nbi nefo ninen.

Natpeneb In matan neu okî ma bnao.

Nít atifkai-ikâ a-npukai baut mâfenâ

he naheun monit lê musti matutan.

Usif nane nhaumak neu atifkai-ikâ,

ma ntoit sin he nasaitan oe ma ‘berô

he natuin Ne on ameput, atuthaes;

he njalin atifkai-mansian amaneot.

Mataf lo nfól, lukef lo ntonô kun.

Tifkai-mansian, mepu amaunû –

mepu kamafnekan, kamamnamî.

Neno nane atifkai-ikâ namkakan.

Ó, kanan atifkai-mansian sin okê!

Ho tifkai alekot es Uisneno In Aän,

tasi amuî-ikâ es pah-pinan amaufinut,

ma ikâ amnahat sin es kanan mansian.

Yogyakarta, Funfanû 2003

---

*atifkai-mansian namnés nok akifkai-atoni.

Kalu

Nâko: Elena Liliana Popescu

Kalu haefes ho nabeî
msû sâ lê kamasuäk,
mutám sâ lê ka nok tuän
ma, mlak mutuin luman,
ka mjail fa es nâko nuasin...

Kalu haefes ho nabeî
mjail manekat masi ka mnék,
mjail fnekan masi ka mufnekan,
mjail molok masi ka mumulok,
mjail neöp masi ka muneöp…

Kalu haefes ho nabeî
mnen sâ lê kamanenâ
mu’ét sâ lê kamaëtâ,
ma mûnoinâ sâ lê kamahinê,
moët feü es lof naübon ka?

Yohanes Manhitu es natlakab
nâko in versi uab Spanyol
Yogyakarta, 6 Funmesê 2012
------------------------------

Dacă

De: Elena Liliana Popescu

Dacă s-ar putea vreodată
Să măsori nemăsuratul,
Să cuprinzi nemărginirea,
Să stai, străbătând neantul,
Să fii nici unul, nici altul.

Dacă s-ar putea vreodată
Neiubind să fii iubirea,
Nesperând să fii speranţa,
Nevorbind să fii vorbirea,
Negândind sa fii gândirea.

Dacă s-ar putea vreodată
Să auzi neauzitul,
Să priveşti în nevăzut
Şi să afli neştiutul,
Ar urma iar începutul?

Versi asli i matuï neik uab Rumánias

Onen Seunbanit neu Ko

Nâko: Yohanes Manhitu

Usî, Amanekat ma Amnaut Ko,

Afémonit amaneot ma Atitus Ko!

Neno mnaë nfin ma namneaën,

neno feü es nemantea ben, Usî.

Ó, Usî Akuasat ma Akubelan,

au he uteab seunbanit neu Ko,

natuin Ho es au atitus ma apanat.

Au, Ho ate kau, fê upein taubsonâ

he ít manse nsae nbi neon-feü i.

Amuït kanan atuas pah-pinan i;

Usif nâko kanan usif naijafafô i

mpanat ma mpaloil au monit piuta

henait au paku kaisâ a-nmaet nít.

Usî, Alekat ma Afekat Amaneot,

au ‘toit ma ‘sanaen Ko, au Apakaet,

he mfai kau enô mlilê ma meûsinê

lê au ami ma ufnekan he ‘pules Ko.

Usî, mhaumakab kau neu Ho hine.

Afémlilê ma afémonit amasat kum,

‘mmoêfa au monit he naheun halinat

lê nabeî mabatî neu au aokbiakin,

he hai ok-okê mipein halinat neno.

Yogyakarta, Funfanû 2003

Feotnai abít oematâ

Muklík meu i he mu'ét foto in sumber.

Nâko: Yohanes Manhitu

Feësat monit i nlal ko neik in maputun.

Nane eslê lasi humâ-humâ lê nasuseb.

Es onnane ho aome nhae ma ho mmeon.

Ho maim bale laba he mufeitin baut

ma mliû meno meiki mninut oetenê

Nbi bale amasat mesê es, bale kninô,

Ainâ Amatakus nsiom ko neik kumanit.

In es Feotnai abít oematâ kaämetos

lê au ‘kiso nbi neno mnanû amasat,

au neonmahonit nbi tasi panin

Sendangsono, Funnimâ 2007

Hine in sain kaätuäs

http://www.essentialparenting.com/wp-content/uploads/2011/03/river-flowing.jpg

Atuis: Yohanes Manhitu

Hine nanét natuin uab

ma nâmaub atoni in neöp,

oke-te nsai npoi natuin hanfuaf

nbi humaf tuis aî humaf tekas.

Naübon nâko humaf tekas,

atoni napán hine nbi in neöp

ma natutan neu batan feü

natuin etus asait nâko fefan.

Batan feü nane nsiom hine,

nanaob ma natutan-nafinib.

Amnémfeûnin naseolbok nok sin,

nlekan sin lalan he npanat piöt.

Npaken atu ma fautbenâ,

sin natlakab hine nâko pah monê.

Huruf es-es nok kun in hanan

ma nmuî otan kalu tabuab sin.

Neu, nâko tabu amkakab nane,

hine namfau mapanat neik huruf

ma batan neno i napnikan laba.

Kalu napnikan, lof napeini nbi tuis.

Masi onnane ka ala fa nbi tuis,

hine msâ es alat humâ-humâ,

tapeini natuin matak ma lukek

ma tpake he tamasab hit monit.

Mansian in hine humne lo namfau,
onlê haube nok un, toen, ma non.
Es onnane, hine lof ka naheun fa 
kalu ala mesê es natua hit lolek.  

Yogyakarta, Funsiô 2010

Neu Atukus Amanekat

In natupâ kau neu humone amliat,

In a-ntoup kau neu oe ‘honis ataäs.

(Mazmur[1], 23:2)

Tabu natpén[2] onlê anislutuf,

nenô ma fai nmansain piuta.

Au fê usnás ma upein malinat,

fun Ho, Atukus, mpanat kau.

Uisneno Atukus Amanekat,

Ho es hau amafot-akinib Ko;

Ho es atónlalan amaneot Ko.

Mjailfa au Atukus nenô-fai.

Atukus-Anonot Amaneot,

tabu he ntea ben he usaitan,

ufeitin Pah Samosir amasat,

he ‘nao eu Pah Jawa amliat.

Atukus-Anonot Amaneot,

au uteab seunbanit a-‘naek

neu Ko, natuin Ho halinat,

lê Ho mukua mulali neu kau.

Ó, Atukus-Anonot Amaneot,

Ho aäm es atanâ neu au haek,

oke-msâ meûsinê neu au lalan.

Ó, Atukus, kaisâ musaitan kau.

Samosir–Sumatra, Funnimâ 2003

Yohanes Manhitu in tuis 

---

[1] Nbi Sulat Knino Beno Alekot, “Mazmur” matekâ nak “Sit Ma Pules”.

[2] Nbi dialek/logat bian natpén masekal neik naplél.

Tabê Natal ma Mlilê Ton Feü!

Tabê Natal ma Mlilê Ton Feü!
Selamat Natal dan Bahagia Tahun Baru!
Bosfesta Natál no Tinan Foun Kmanek!
Salamat Natal dan Bahagia Taon Baru!
Sugeng Natal lan Sugeng Warsa Enggal!
Merry Christmas and Happy New Year!
Joyeux Noël et bonne année!
¡Feliz Navidad y próspero año nuevo!
Feliz Natal e Feliz Ano Novo!
Buon Natale e felice anno nuovo!
Fröhliche Weihnachten und ein gutes neues Jahr!
Natale hilare et annum faustum!
Bonan Kristnaskon kaj feliĉan novan jaron!