Saturday, October 31, 2026

UAB RUJAK

Foto: https://gofood.co.id

Atuis: Yohanes Manhitu

Kalu ho meuk mít rujak,
ho muhín hanfuafe otan.
Nbi foknais amnanut mesê,
haufuâ humâ-humâ maselô.
Upun, kaut, ekam ma kijabas
masalâ, ma nabuan bale mesê.
Oin’oefe nmoê selot i nminoin.

Me uab rujak, in ka on fa nane.
Uabin lo maselô, me ka namín fa.
Ho mait hanfuafin nâko uabes kun
ma mseol muklatî sin nok uab bian.
Neu, nbi ho molok nane, hanfuafin
mamnaitî nâko uab nua aî a-nnès.
Ma ho mumlilê fun ho uab rujak.

Kalu ho mpaek uab nane piuta
ma muneöp mak in lo namás,
au lof ka uhín fa uab fauken
es ho lo muhín sin namtás.
Kalu muhín uabe puknes,
neu mpaek sin lekleok
he pah-pinan i nahín.

Bandungan, Ungaran,
Jateng, 6 Funhitû 2025

Thursday, October 29, 2026

Uab Amonit ma Pah Mafnekan: Koleksi nâko Tuisin nèk Uab Metô (Yogyakarta, Funboës 2026)

Foto: Diandra Kreatif (Funboës 2026)

UAB es-es nabè’ mapakê ma njail nete he tateab ma tbait hit neöp mansiane neu tuaf bian. Ma uab Metô lo nabè’ mapakê neu salit alekot nane, natuin humaf molok ma tuis. Kalu natuin tuis, in humâ fauk, onlê esai, artikel ma biografi lê matuï ma mapublikasi he tbait neöp neu to-amfaut. Masi onnane, he nabè’ tateab neöp tèk tuis natuin uabes lê ka biasa fa mapakê namfau neu tuis, hit a-tparlú sinmakat ma nenuf a-‘naek.

Buku i natám nan tuise nonô 30 (bôteun) nèk uab Metô a-ntomneu uab, sastra, ma budaya lê au ‘tui sin nâko ton 2006 talantea ton 2023. Tuisin nâko koleksi i npoi nahunun esan au blog neu uab ma sastra Metô (https://uabmeto.blogspot.com) ma buletin Amnèkhanaf, lê funan nua npoi haefes ma masònû gratis neu abaca-sin natuin email (nâko Funnê 2010 talantea Funnuâ 2014, edisi 23).

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007