 |
| Foto: hatobuilico.wordpress.com |
Atuis: Yohanes Manhitu
Humaf-humaf lo namlilê he nseun ko, Aokbian,
oras ho musaitan kota ma mfain meu ho kuan –
baelmahonit lê nafètin ko ben he mlak tasi.
Ho mtae mufanî foto oras ho fê an-anâ ko
ma mkios bale oras ho unû mûbaë mbin
mok ho aombiamin lê munî i esan kuan
aî ‘ló ben sin natuan esan bale bian.
Nbi kuan-es ho mupén lalan lê maäspálen,
ho mít oe lê munî i nsai ntam neu ume
natuin bèskanu lê ném nâko ‘nuüf nae.
Fai-fai paku npin onlê neno fê manas
ma ka mít fa pakûfenu nok paukminâ
fun sin nuasin mabelâk es tetu tunan.
Me sâ-sâ alekot ma amasat lê matekâ nane,
fêka ntea fa pah ma nifu in tunan ma in ikon
fun nbi bale namfau, fatu ma ‘bolâ natau lalan,
oe mamnamî ma masosâ onlê mnautbuâ
ma mèsökan fê nanaob kun in kuasa.
Yogyakarta, Funtenû 2009
No comments:
Post a Comment