Au puisi uab nua "HANAF ALUMAT NÂKO NENO-TUNAN-BELSONO EL LA ĈIELO" mapublikasi ben es Literatura Vivo* (Edisi Funsiô-Funboës 2025), nane majala sastra Esperanto lê atuipusi Esperanto nua nmoë ma nanaobe. Atuis ese (Erika Godó) nâko Hungária ma es a-ntèn (John Huang) nâko Pah Sinas (RRT).
Seunbanit namfafau neu atuipuisi Erika Godó ma John Huang lê a-npublikasi puisi uab nua nane. Tafnekan he majala Literatura Vivo nnaomát ma nsukses piuta. Tabê uab ma sastra! 💖
Puisi uab nua (bilingual) nane nabè’ mabaca gratis es literaturavivo.com. Tbaca lekleok kalu tmuî taubsonâ. Nabè'i msâ tateab hit komentar a-ntomneu tuis i ma in publikasi. 👉
------------------------------------HANAF ALUMAT NÂKO NENO-TUNAN*
Atuis: Yohanes Manhitu
Neu Wolfgang Amadeus Mozart
Haef namfafau ben ho musik amasat
nabia kau nbi mnamit amnanut nanan.
Au nekke nlem neu melodi kaäsnasat
lê namasab tabu in lakat a-nbi lalan.
Haef-haef au utnín ho musik alumat,
au nekke naheun nok dame in sain
lê ném nâko neno-tunan amnanut,
lo onlê malaikat puknes in hanan.
Ho onlê mukeo kau piuta he ait lakat
he ‘nao ‘tean hanaf amasat in usan
lê nakinbon es bale ‘loö mapanat,
ma ho musik a-nsai ntea in nanan.
Ho kanam, ho hanam nlakan nakat
ma naheun nekaf a-nbi batan-batan
onlê piöt nâko beï-naï lê mapanat
neu sufâ-kaüf lê natua pah-pinan.
Hanaf alumat i ném nâko Abalbalat
ma nsai natuin ho musik in masan.
Au nekke nsai nbi mlilê neu nenat
ma ‘pules Usif abít neno-tunan.
Yogyakarta, Funsiô 2012
--------------------------
Foto: Nâko majala Literatura Vivo
No comments:
Post a Comment