Thursday, October 9, 2025

Tabê ma Pules neu László Krasznahorkai, Asiomhadia Nobel Sastra Ton 2025! Sastra Nmoin Piuta ma Nmuî Upan!

Foto: https://www.irishtimes.com

NBI funan i (Funboës 2025), Akademi Swedia nbònunen nak László Krasznahorkai (mahonis nok tanggal 5 Funmesê 1954) es a-nsiom Hadia Nobel Sastra (uab Swedia: Nobelpriset i litteratur). László i atuinovel (novelis) ma atuiskenario ahinet ma amakoet nâko Pah Hungária.

Natuin sumber internet fauk, László in novel ahunûsekê majudul Sátántangó (1985; Metô: Santuafe In Tango). Novel i lo naäitî in kanan on atuinovel makanâ ma 'naek a-nbi Hungária in sastra.

Tèk nek'amlilet, hit a-tfe tabê ma pules neu László Krasznahorkai, ma tafnekan he nbi neon'amunit atuis nâko Indonesia msâ nabè'i nsiom hadia 'naek sastra i, lê makanâ a-nbi pah-pinan nobamesen. 💖
Posted by at

No comments:

Post a Comment

Subscribe to: Post Comments (Atom)

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu
ymanhitu@gmail.com

Yogyakarta, 14 Funboësamnuâ 2007