Wednesday, August 1, 2012

Lalan Mâlelat, Lalan Amasat



Nâko: Yohanes Manhitu

Kiskase neno-tunan,
lal’opâ aineraka.
(Sít Uab Metô)


Au i asaenoah afnekan noah makukê kau,
au i aheiltuâ asinmakan tuâ aminonit kau.
Au he ‘tean noahe in tunan masi masabuit,
au he umteut tuâë in heun masi maätfuan.

Lalan neu sonaf malinat naheun nok katilâ,
opâ neu pah sisi ma baluf maämû neik nipu.
Lobaithe skunat-katilâ kaisâ namtaub kau.
Ma lobaithe nipu atais kaisâ nafolob kau.

Anin a-npaisâ kau he ufeitin salit amnanut,
nope nkumâ kau he usaitan tenab amaneot.
Salit amnanut, mauthe nbiul onlê penpene;
ma tenab amaneot, mauthe nmoin nabala.

Nansâ mtaus musti nükan nekaf amâtanes?
Nansâ meisökan musti naplenat meûsinê?
Mauthe mtaus i npoi natuin nautus afinit,
ma mauthe meisökan naen natuin oe asait.

Kupang–Timor, Funmesê 2004

No comments:

Post a Comment

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007