Manas Aklahat ma Ulan Apopit

Nâko: Yohanes Manhitu

Manas a-npín ma nsounû klahan neu pah-pinan,

ntulun kanan hau-amonit he namót moêbukae;

nfe sonâ neu muït he nameu aokin nâko tume,

nafeitin tuaf he nasaitan ulan ma nameu nekan.

Atonîhonis in lomit lo humâ-humâ, ka ntû nít fa;

mansiane in sinmakat lo namfafau, onlê hausufâ.

Nbi oras manas a-nmapút nis, in nafnekan ulan;

nbi tabu ulan nasaib noe, in a-ntoit nenomatan.

Manas kaisâ mout mûsekê pah kiu bafê aminonit,

ulan kaisâ a-mfaes mumeu ane ma penâ amonit.

Ó manas, mfe kai ho pinam me kaisâ mususeb!

Ó ulan, msounû kai oe kninô me kaisâ mulemab!

Yogyakarta, Funboësamnuâ 2003

Nekaf Amlilat

Nâko: Yohanes Manhitu

Au upén anin a-nfu haunoö amalulet,

au nekak onlê he naen natuin in bilut.

Me in ka naen natuin fa anin afút afinit.

In musti nhaek nâtét onlê ní uf amepat.

Mauthe nbi neno i nope nâkún nú asait,

ma mauthe pah-pinan a-ntol oe amoufut.

Me au nekak, in musti nâkún lasi amlilat

fun neno-neno, tetus Apakaet manebet.

Mkios manas, in ka natón fa in makoet.

In natonon neik pehe onlê atoin-apehet.

Laispehe nane, in es uf neu kanan nukat.

Es onnane, nekaf musti nâkún sinmakat.

Kupang–Timor, Funnuâ 2004

---

[1] Nbi logat Amanatun haunoö matekâ nak haunô.

Seunbanit Neu Monit

Nâko: Yohanes Manhitu

Mkios ma mu’étkumfanai

manas natból ma nsaeném

nameot kanan ‘lumâ atais

nhâtaen haunoö atupas

ma nafenâ kuan amnait.

In napê tasi amanuat.

Afu apetas nít maputû

kolo âkolô napoitan aon

manu atupas nasaitan hau

fafi amnahat nafnekan haot

oematâ ma prigi naheun tuaf

aof ma smanaf naëkun nfanin.

Ka nmuî fa hanaf aî toni amasat.

Alaha seunbanit neu monit feü

lê manebet nâko neno-tunan,

masanut nâko bale amnanut -

bale ma sonaf monit piuta.

Yogyakarta, Funboës 2004

Onen Fêka Tupas

Nâko: Yohanes Manhitu

Usî, kalobes au aoke he nasnás.

Me au smanak lof a-nbê piuta,

natuin in ka nloim fa he nâbíl.

In he nfain âhakê neu au aok.

Apakaet, mauthe fai namsoup;

mauthe fai masekâ neik nenô.

Ma funan masekâ neik manas,

me nanait amasat sin nasufan.

‘Tebes ma nmaneo au i ‘hae.

Au aoke namén ma nmâniun,

me monit i lof musti matutan.

Usî, muheun kau meik mâtanê.

Usî, mfe kau noknokâ amasat

lê nmeûsín nok manas atanâ

ma kolo asít aseun meûsinê.

Mauthe neon-feü neik tetus.

Kupang–Timor, Funtenû 2004

Maufinu

Nâko: Yohanes Manhitu

 

Maufinu, lalan alulut neu meisökan.

Maufinu, akalab nekaf akninô ma amnaut.

Sekau es a-nnek maufinu, nnek meisökan ânaet;

sekau es a-npules maufinu, nfei enô neu Aipinâ.

Maufinu, ka neik fa amlilat ma aominâ-oetenê.

In apaisâ ma afulit neu kanan smanaf aniät-atelos.

Maufinu, nasoeb kit nâko lalan sonaf neno-tunan.

Mpanat ho aom ma smanam he kaisâ natuin in fulit.

Maufinu, kanan atoin-amonot sini ‘maus afopunut.

Ala atoni amaneot sin es lof nabeî naneuk maufinu;

alaha smanaf akninô sin es lof nabeî nakalbe.

Mtulun he mupasib ho ‘monim nâko in. 


Yogyakarta, Funhitû 2003

Nuibnapâ

Nâko: Yohanes Manhitu

Uabe nak, ho nane mamnaitî nâko au nuibnapâ

he namót ho aom afomenit ma smanam amalulet

henait pah-pinan naheun nok halinat ma malilat.

Es onnane, neno i hit nuakit taëuk ma tmatéf.

Au ka uhín fa lasi, alaha Uisneno es a-nlek;

alaha In es a-nmuî kuasa he nlul ma nafék lasi.

Mauthe sâ-sâ a-njail natuin In lomit ma In lekat;

mauthe pah-pinan ma neno-tunan nabés neu In.

Lomasit ho es au nuibnapâ natuin laismantäen.

Au ufnekan he Uisneno In halinat natkuanai

henait hit nuakit a-tmatoup teu meja-altár

ma hit fefak a-npulan hantaën, laisleü.

Yogyakarta, Funfanû 2003

Alter Ego

Nâko: Yohanes Manhitu

Au i ‘mes, ka ok fa sekau.

Au i tuaf mesê: aof mesê,

smanaf mesê, neöp mesê.

Me nane matak ini mnitas.

Nbi oras ít kuk eik matak

au hafok a-nbi ‘ninô nanan,

au uneöp tuaf bian onlê aû,

in sâ-sâ namnés nok kau.

Haefes au ‘mes utenab kuk,

kaiskaisâ a-nbi pah-pinan i

nmuî atoni on au fotokopi,

ka ala fa hafok a-nbi ‘ninô.

Kefa-Timor, Funnuâ 2011

---

Alter ego (Latin, aof/tuaf bian)  

Malaikat neno afinit

Nâko: Yohanes Manhitu

Oras kfun nasaitan neno-tunan amanuat

fun neno feü-es nemantea ma nhosén,

ho mjail malaikat afinit kamapnikan.

Ho kanam a-nmoin, masi kamatekâ

Mkios, hit neno ma fai afinit amastin

namnaub kit nuakit neu taën ma supat:

hit hanfuaf kamanesâ onlê aen-apâ

lê unû namlia ma namasab monit

Malaikat afinit, monit i onlê drama.

Haefes hit nuakit taëuk he tâbaë.

Ma oras hit pâ’e nfinen, hit tasnás

onlê kfun lê nasaitan neno-tunan

Yogyakarta, Funnimâ 2007

Tnek Laistuis

Neu ahínhuruf ok-okê

Laistuis nane onlê bifé amasat

lê musti manekâ, okê mapules.

Hit a-tnek laistuis, tnek laishine.

Sekau es a-ntui, njail saksi ahinet.

Aim he ttui, ttui ma kaisâ tasnás.

Mtae ho ‘tuï onlê mumasan fani,

mubai ho sulat onlê nasi âtemes.

Mûtesan ho ‘tuï meik ho nekam,

mkios ho banit meik kumanit.

Laistuis, lalan amaneot mesê

lê lof neik ko neu pah sisbaluf:

baluf hine ma tenab masinmakâ.

Neu, aokbian, msain kit ho ‘tuï nai.

Atekanab nabeî napnikan laistekanab,

afétoni nabeî napnikan in toni alumat,

me ameuptuis, in lof a-ntui nabalbal

fun in hanfuaf-sin lof matuï piuta.

Yogyakarta, Funfanû 2003

Yohanes Manhitu in tuis