KUPANG: KOTA FAUTPUTUN

Foto: http://arsiptravel.blogspot.com

Atuis-alulat: Yohanes Manhitu

(Neu Kupang, Kota Kamapnikan)

Nhaek nâtét, on ní uf nâko hau nasib,

Naî Kopan akubelan in bale ma in luan.

Bale lê natutbon neu fautputun amepat;

luan lê napán etus ma nuün batan-batan.

Naijasiüf Timor Neontés, neno in mòfun.

Pusmau ma Rote njail in sobâ apaumakat,

Penfui ma Teno nfain-on enô pah manuan.

Mabahâ nèk oe biru, nesâ maüpâ in tuan.

Neno unû, hun ma nasi naheun fautputun,

tuâ asaib tua minâ nbah tasi ametak ninen.

Bijae metô ma molô npaon hun ma oematâ.

Bikase njail amnatas ma asenut neu usif.

Matâteme mapausmutî naleün nono ameut,

nabutab naijúfin he nasaib kaäsanab sin nâ.

Kota fautputun naheun nok ‘takaf amonit.

Kaisâ mupnikan bahfatu Fort Concordia.

Masi oe in upne namnés nok minfomenî

aî manas amnòtse nkiso nèk nekmakoet,

mauthe kota fautputun i nhaek nabala

he njail Timor Neontés in enô ‘naek.

Kupang-Timor, Funnuâ 2004

Ludwig Wittgenstein Namolok a-Ntomneu Uab

Foto: www.google.com

Au uabe in tuän, nane au pahe in tuän. 

(* Au hine in manuane eslê au hanfuafe ini mfaun.) --Ludwig Wittgenstein (1889–1951)

Molok Asaitan Pah

Atuis-alulat: Yohanes Manhitu

(Neu uab an-anâ abitin pah-pinan) 

Nmolok onlê haunoö âkiät
ma oke-te, nkua neu naijan.
Nane es molok asaitan pah. 

In hanan ka manenâ fa ben.
Alaha in hukun a-nbi sulat.
Nane es uab lê a-nmaeten. 

Onlê usif lê nasaebon nalail,
in matekâ, me ka manenâ fa.
Nane es molok kamamasâ. 

Neno-neno uab pukan natfék
fun abeüt a-nmaspètin nnèsin.
Sekau es lof a-ntulun he npao?

Sansekerta alaha kanan abalat,
Latín naheun buku mafauban.
Neu, Uab Metô i lof neu mé?

Kupang–Timor, Funtenû 2004

Au I Hanaf Mapaän Kau

Foto: www.google.com

Atuis-alulat: Yohanes Manhitu

Nenô ma fai nhuilan onlê othaef, ka nasnasan,
me au ûleltok, au ka ‘loim fa, sin es nâlelat kau.
Hoè, au i ka labit kau fa; au ka matâteme kau fa.
Au ka ufó fa. Au msâ ka ‘mânisib fa uisfeotnai.  
Nansâ es au luluk ma fefke nmânisin au toni?
Neu mauthe manas ma funan es nahinen lasi.
 
Pahe in sufan ma kaün onlê napnikan kau ben
fun limat ma masaf moderen naheun sin lulkin
ma pankatoli nahonis laisfuaf neno-tnanaf âloö.
Sonaf laishine ma ‘noinâ nasaitan nono nek’uab,
atenab ameûsinet sin masit napnikan au masak.
Au ‘fain onlê apaokuan kamakisô, kamasian.

Yogyakarta, Funfanû 2003

NBI MABÊ HIT FÊ TABUA

Foto: www.google.com

Funan fai i ka nmeu kun fa
onlê nbi mabê hit fê tabua
tafètin oras he ntòp lalan,
ma hit tatuin in kubelan.

Atuis: Yohanes Manhitu
Yogyakarta, 23-05-2018