KA MJAIL FA ALEKOT

Foto: www.google.com

Nok fai kalu ka muhín tupas,
nok nenô kalu ka muhín mepu,
neu atenus, ho ka mjail fa abas;
neu anaot, ho onlê ulan ma nipu.

Atuis: Yohanes Manhitu
Yogyakarta, 05-09-2017

AU NEKAK NOK IN MALAK

Foto: www.google.com

Kalu he mubák man au nekak,
kaisâ mtek mûmoe au kanak.
Kalu mubák mane, mubelak,
fun au nekak nok in malak.

Atuis: Yohanes Manhitu
Yogyakarta, 29-08-2017

MUMEPAN HO SALIT

Foto: www.google.com

Mfe tabê neu noknokâ amnemat
lê a-ntea ma nhoen ko neu fnekan
he mumepan ho salit ma mnaomát,
onlê he mhalín ho feotnai in nekan. 

Atuis: Yohanes Manhitu
Yogyakarta, 04-08-2017

Gitanjali 21

Foto: https://www.youtube.com

 
Nâko: Rabindranath Tagore

Au musti auf au bnaobe in toli nai. Tabu ahaetin a-nfinin a-nlekun tasi-ninen—Adú sin néman neu kau!

Oras haunatún nalail sufan ma nasnásen. Ma oras i, èk hausufâ amaknenê kaäjalit in baut, au ‘pao ma ‘moin piut.

Tasi in okî naslút, ma nbi tasi-ninen a-nbi lalan amnókmafô, haunoö amolkin nâbeok’in ma natkuan.

Lo baelluman eslê ho mupén meun!

Ho ka mutnín fa nek’âtaï nfin natuin anin nèk sít nâko bale âlóte in hanan lê nâlae nâko tasi-ninen bian?

Tlakab neu Uab Metô: Yohanes Manhitu
----------------------------------------------

[1] Labit: musim semi; Ingris: spring; Portugis: primavera.
[2] Nbi dialek bian (Amanatun ini), matekâ nak haunô.

Gitanjali 20

Foto: eugenehon.blogspot.com

 
Nâko: Rabindranath Tagore

Nbi neno nan, nbi oras terate nasúfen, adú, au nekke namneuk, ma au ka uhíne fa. Au ‘poni luman ma ‘fulâ nane ka makisô mnitâ fa.

Ala oras i ma ntènintèn, neksusre ntoman kau, ma au u’úb nâko au nanait ma ‘rasa nobif aminonit nâko fomenî-es lê naik kun a-nbi anin afút nâko knaben-ahinet.

Minonî sab-sáb nane namenab au nekak nèki mnaut ma au ‘kiso, in onlê foknaise snasan asinmakat lê fê naim in henun.

Au ka uhín fa ak in a-npaumák nís, ak nane aubê, ma ak minonî ahenut i npoi nbi au nekak in kòpun amnanut nae. 

Tlakab neu Uab Metô: Yohanes Manhitu
-----------------------------------

[1] Labit: teratai; Ingris: lotus; Latin: Nelumbium nucifera.

[2] Nbi dialek bian, matekâ nak nanaif ma unmait.

[3] knaben-ahinet (Labit: selatan; Ingris: south).

[4] Nbi dialek bian, matekâ nak meunanâ.

Gitanjali 45

Foto: www.google.com

Nâko: Rabindranath Tagore

Ho fêka mnen fa in lakat kaäslutus ka?

In ném, ném, in ném piuta.

Tabu ma oras es-es, nenô-nenô ma fai-fai in ném, ném, in ném piuta.

Au ‘sí síte namfau ben a-nbi neklomit amfaut, ma sítin nane sin nótin natonan piuta nak, “In ném, ném, in ném piuta.”

Nbi neno afomentin a-nbi Funhâ ameûsinet, natuin lalan abít nasi nanan, in ném, ném, in ném piuta.

Nbi mèsökan nok ulan fai Funhitû sin, nbi kereta aslutus, in ném, ném, in ném piuta.

Nbi susar nasòp susar, nane in laktin lê napènit au nekak, ma nane in haen nok leöt a-mnatû es a-nmoê au mlil’e nmeûsín.

Tlakab neu Uab Metô: Yohanes Manhitu

HANMEÛSINÊ NEU KALAT

Foto: www.google.com

Atuis: Aníbal Núñez

In a-ntok nalali nbi musu nakte in matan
nbi ‘tokô âbekô, ma naäibon kun nâko
ken’apótin, nkumain: kenfuaf ahunte
nmoê bifé nae napáp maneunleüf.
In lof nâbekô nabala kun
tala sin ok-okê nalail kenfuaf ma upat.

Tlakab neu Uab Metô: Yohanes Manhitu
Berbah, Yogyakarta, 29 Funnê 2017

Gitanjali 37

Foto: www.google.com

Nâko: Rabindranath Tagore

Au uneöp ak au lalne namsòpen a-nbi au ‘mâtanek in tuän,—ak lalan abít au matke maëkâ, ak au bukae-lalan ka nmuî fa ben ma tabu ntea ben he umaoftok a-‘bi mèsökan kaäslutus.

Me au utnín ho loimte nmoin nabala nbi kau. Ma oras hanfuaf amnátin a-nmaten a-nbi au mák, melodi feü namfau npoinéman nâko au nekak; ma nbi bale haenobif amnátin namnekun, pah feü masikô nok in moëskeknin. 

Tlakab neu Uab Metô: Yohanes Manhitu

Lalan amanuat

Foto: Mamnaitî nâko au koleksi kun

Lalan amanuat, lalan mafnekan,
masi naheun nok katilâ ma 'naus.
Sekau napán manekat es in nekan,
lof a-npante lekleok fun nane 'maus.

(Hanfuafin: Yohanes Manhitu, 2017)