Thursday, June 30, 2016

Gitanjali 18, nâko Rabindranath Tagore, Versi Metô

Foto: www.google.com


Nâko: Rabindranath Tagore

Nope natutbon neu nope ma nmès’ók.
Ah, manekat, nansâ es ho mufètin kau he ‘pao
‘mesmés kuku ‘bi monê, ‘bi enô i?

Nbi oras sonet neu mepu amfaut a-nbi nenô,
au ok atoni ‘tepânaek; ma nbi neno mèsökan oras au ‘més,
au ufnekan eu ba ko.

Kalu ho ka mulilê fa ho humam neu kau,
kalu ho mpesbiâ kau nabala, au ka uhín fa onmé au lof
he ufinib oras ulan amnauntin.

Au upén ka usnás fa neno-tnanan in pinan âlôsekê nae,
au nekke naöin ma nkae natuin anin nek’asebot. 

Tlakab neu Uab Metô: Yohanes Manhitu

ETUS PALPALÂ NÂKO KUAMNASI

Foto: hatobuilico.wordpress.com

Atuis: Yohanes Manhitu

Humaf-humaf lo namlilê he nseun ko, Aokbian,
oras ho musaitan kota ma mfain meu ho kuan –
baelmahonit lê nafètin ko ben he mlak tasi.
Ho mtae mufanî foto oras ho fê an-anâ ko
ma mkios bale oras ho unû mûbaë mbin
mok ho aombiamin lê munî i esan kuan
aî ‘ló ben sin natuan esan bale bian.

Nbi kuan-es ho mupén lalan lê maäspálen,
ho mít oe lê munî i nsai ntam neu ume
natuin bèskanu lê ném nâko ‘nuüf nae.
Fai-fai paku npin onlê neno fê manas
ma ka mít fa pakûfenu nok paukminâ
fun sin nuasin mabelâk es tetu tunan.

Me sâ-sâ alekot ma amasat lê matekâ nane,
fêka ntea fa pah ma nifu in tunan ma in ikon
fun nbi bale namfau, fatu ma ‘bolâ natau lalan,
oe mamnamî ma masosâ onlê mnautbuâ
ma mèsökan fê nanaob kun in kuasa.

Yogyakarta, Funtenû 2009

Tuesday, May 31, 2016

Gitanjali 76

Foto: www.google.com

Nâko: Rabindranath Tagore

Neno nasòp neno, Ò au monit in usif,
au he ‘haek ma humaf nok humaf ok ko.
Èk au ‘nimak maliäk, Ò usif neu pah ok-okê,
au he ‘haek ma humaf nok humaf ok ko.


Nbi ho neno-tunan manuan in nupun, ‘més ma kaüslút,
èk nekbaun, au ‘haek ma humaf nok humaf ok ko.
Nbi ho pah-pinan ameput, lê naslút nok banit mâfenâ
ma laismepat, nbi to-amfaut amanapat sini tnankin
au he ‘haek ma humaf ma humaf ok ko.


Ma oras au mepu nmoten a-nbi pah-pinan i,
Ò Usif neu kanan usif, ‘més ma ka hanës fa,
au he ‘haek ma humaf nok humaf ok ko.


Tlakab neu Uab Metô: Yohanes Manhitu

Gitanjali 75

Foto: www.google.com


Nâko: Rabindranath Tagore

Ho fét neu kai atonîhonis natís hai parlútin ma masi onnane, nfain nèt neu ko ka nasnás.
Noe nok in mepu neno-neno he manaob ma nmanáp natuin lele ma ‘sane; masi onnane, in sain kaätfekas nane nliänfain kun he nboe ho haem.

Hausufâ nminonib anin nèk in fomenin; me in mepu amunit eslê he ntul’on neu ko.
Fuat neu ko ka nmâmuïb fa pah-pinan. Nâko atuipuisi in hanfuafin nane, mansian nait otaf sâ lê namlileb sin; me sin otaf amunit a-nlul neu ko.

Tlakab neu Uab Metô: Yohanes Manhitu

Monday, April 11, 2016

Konfusius a-ntomneu Toäs

Foto: google.com
Sekau es nabè'i nkuasa in toäs,
nakalab kun in musu ânaêsekê.

--Konfusius, filsuf Pah Sinas
Versi Metô: Yohanes Manhitu
Yogyakarta, 10/04/2016

Lakat

Foto: www.google.com

Lakat mesê ma lakat nua
nèk kit neu naot amnanut.
Nbi neno mé mepu nafua,
tfesat fê masi ala mninut.


Atuis: Yohanes Manhitu
Yogyakarta, 12/04/2016

Thursday, March 31, 2016

Gitanjali 36


Foto: http://www.fai-kao.com

Nâko: Rabindranath Tagore

Au onen neu ko eslê i, usî ---mbok,
mbok main pakit ini ‘baän abít au nekak.

Mhâtaen kau baun-baun he ‘tamis nekamlilê ma ‘sutai neksusar.

Mhâtaen kau he ‘moê au manekat nafua nbi mepu nanan.

Mhâtaen kau he kaisâ usík ít amâmuït ini ‘maus
aî ‘mòfhae eu kuasa amaufinut.

Mhâtaen kau he kaisâ utenab moët kamaüpâ neno-neno.

Ma mhâtaen kau he ‘nonâ au ‘bè’ik neu ho lomit èk manekat.

Tlakab neu Uab Metô: Yohanes Manhitu

Sunday, March 27, 2016

Neno i atu uteab (èk uab 15) ....


Prospera Pascha sit!
Joyeuses Pâques!
¡Felices Pascuas!
Páskua Kmanek!
Selamat Paskah!
Sugeng Paskah!
Feliĉan Paskon!
Buona Pasqua!
Happy Easter!
Frohe Ostern!
Tabê Paskah!
Feliz Páscoa!
Kaló Páscha!
Paște Fericit!
Fish Sa'id!
-------------------
Ilustrasi: http://www.jesusfestct.org

Monday, February 29, 2016

Penpasû


Foto: http://alfianwidi.com

Atuis: Yohanes Manhitu

Sekau es ka nahín fa penpasû?
Sekau es fêka neuk nít fa penpasû?
Penpasû nane mnahat Pah Timor.

Tuaf bian a-nteke nak penhanâ
aî bian nak jagung katemak.
Kalu mahanâ maselô nok fue
ma utkaut aî kaufuâ.
Haef bian maselô nok tuinbafê
ma utnunuh makukê.

Munî i ‘makäne mamnahâ
neno-neno nbi mé-mé.
Nâko noknokâ talantea
fai’atnanas. I nmaneo.
Kaiskaisâ nokâ penpasû
lof mapnikan.

Masi hit tah ‘makäne haef namfau,
kaisâ tapnikan tain penpasû
fun ini msâ hit bukae.

Yogyakarta, Funhitû 2003

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@gmail.com

Yogyakarta, 14 Funboësamnuâ 2007