Umnau neno mnanû afinit

Gambar: www.google.com

Haef-haef, nbi oras he 'túp,
au umnau neno mnanû afinit.
Eu ho nekam, au 'loim he 'súp
ma utua be menit nasòp menit.

Atuis: Yohanes Manhitu
Noemuti, 12-02-2018

Fnekan i nabala neu ko

Foto: www.google.com

Fê onlê a-nbi neno ahuntin,
au ufnekan piuta he ít ko.
Msâ nbi neno amnemtin,
fnekan i nabala neu ko.

Atuis: Yohanes Manhitu
Noemuti, 11-02-2018

Mnao he mtaun ikâ

Foto: www.masterfile.com

Nbi tabu ho mnao he mtaun ikâ,
ho lof ka mupnikan fa ho tanu.
Mnahat lo musti natua 'pikâ
masi in ka nok fa sismanu.

Atuis: Yohanes Manhitu
Noemuti, 10-02-2018

Tasaeb seunbanit

Foto: www.google.com

Fai amnanut i nlak baun-baun.
Menit nasòp menit, ma au ít.
Tetus natkua nok ini mfaun.
Neu, hit tasaeb seunbanit.

Atuis: Yohanes Manhitu
Noemuti, 06-02-2018

NEKAM KAISÂ NOK MENAS

Foto: www.google.com

Nbi akimû, ho munekun manas,
me funan lof ném natua balan.
Ho nekam kaisâ nok menas
fun meûsinne ntanâ lalan.

Atuis: Yohanes Manhitu
Noemuti, 06-02-2018

Gitanjali 33

Foto: https://www.mnn.com

Nâko: Rabindranath Tagore

Oras neno ntea ben, sin a-ntaman neu au ume ma nakan, “Hai lof mitua ba bale an-anâsekê nbi keän i.”

Sin nakan, “Hai lof a-mtulun ko he mfua ho Uisneno ma hai msiom mèk nekbaun ala hai pâ’e nbi In halinat.”; ma oket sin a-ntokon nbi siüf ma ntokon n’én ma nabesan.

Me nbi fai in mèsökan, au upèn an sin a-ntaman neu au bale kninô, nmanenun ma naslutun, ma nèk palû amleüt, sin nait nain kanan ‘tulû-ma-tnatas nâko Uisneno in altar.

Tlakab neu Uab Metô: Yohanes Manhitu
---------------------------------------------------
[1] Feësat, natuin ejaän bian, matuï nèk hanfuaf nua: Uis Neno.

Gitanjali 32

Foto: www.google.com

Nâko: Rabindranath Tagore

‘Tebes, sin lê a-nnek kau nbi pah-pinan i nsobal he nhuk natau kau. Me nane somak natuin ho manekat es nânae nnèsin sini, ma ho msèf mufètin kau.

Kalu au ka upnikan sin, sin lof ka nnaon nasaitan kau fa. Me neno nasòp neno ma ho ka mamnitâ ko fa.

Kalu au ka ‘boin ko fa nbi au onen, kalu ka upán ko fa nbi au nekak, ho manekat neu kau fê a-npao au manekat.

Tlakab neu Uab Metô: Yohanes Manhitu
-----------------------------------------------
[1] Nbi dialek bian, matekâ nak ‘nikan.
[2] Nbi dialek bian, matekâ nak oën.

Gitanjali 28; Atuis: Rabindranath Tagore

Tainbesi afutsin namepan, me au nekke namén oras au uäkâ he ‘fek ain sin.

Laisfètin, ala kun in es au ‘lomi, me he ufnekne, au umaebok kuk.

Au nekke namép ak a-‘maus upmâfénleüf es ho, ma ho es au abiät alekôsekê, me au nekke ka ntea fa lakat he ‘polin mnautpisänâ lê naheun au keän.

Kastenus lê a-nkub kau, nane kastenus atahan afuskukû ma mates; au ka ‘lomi fa, masi onanne, au ‘hobe èk manekat. Au utús ka babaun fa, au ‘mòf haef-haef, au mae mâkolô ma nmâfén; masi onnane, au òm he ‘toit neu au ‘lekok, au umtau ûtaï kaiskaisâ au onen matulek.

Gitanjali 24; Atuis: Rabindranath Tagore

Kalu neno ntea ben, kalu kolnin ka nkaen ntènin fa, kalu ainne nhae kunen he nfú piuta, neu mhel mèsökan in amut he mkub man kau, masi onlê ho mäum mulail pah-pinan mèk tupse in amut ma baun-baun a-mkub terate akuate in nokin a-nbi akimû.

Nâko anaolalan, lê in aulbukae luman oras fêka nasòp lalan, lê in aptaise natpius ma afuskuk’e ntoman, lê in mâtanen namneuk nain kunen, mnoes main fa mae ma mâmuït, ma mûfeü in monit onlê hausuf’e nbi ho fai alekot in kasteunse nanan.