Saturday, October 10, 2015

Naot i musti namsòp


Monit neno i fê onlê monit a-nbi neno afinit
ma hit tatutan mepu tèk makoet on abanit.
Masi nbi lalan, hit tít nipu ntai, nfain akinit,
naot i musti namsòp kalu he tjail apènit.

Hanfuafin: Yohanes Manhitu
Yogyakarta, 6 Oktober 2015
Posted by at No comments:

Mlak mutuin humone


Ho mutból òm, ho mnao baun-baun,
mlak mutuin humone amanuat amliat,
kumanit naheun ho humam ama'èkit.
Hausufâ lê ho mèki kaisâ namafun.

Hanfuafin: Yohanes Manhitu
Yogyakarta, 5 Oktober 2015
Posted by at No comments:

Amuîhines mapules ma mâlatan


Amontes mapules ma mâlatan a-nbi in ume.
'Nakfes mapules ma mâlatan a-nbi in kota.
Uisfes mapules ma mâlatan a-nbi in pah.
Amuîhines mapules ma mâlatan a-nbi bale-bale.

(Matlakab neu Metô nâko tuis Sanskerta natuin uab Inglés.
Atlakab: Yohanes Manhitu, 2015)
Posted by at No comments:

Taim kuk hine he tanún


Sekau es nahín lekleok nekaf ini mnanun
ma lomit aî sinmakat in tuän amaneot?
Haef-haef hit taim kuk hine he tanún,
me hit tanèkun namfau nbi hit naot.

Hanfuafin: Yohanes Manhitu
Yogyakarta, 1 Oktober 2015
Posted by at No comments:

Tuesday, September 29, 2015

Neno he ta'úb mepu


Neonmesê, nane neno he ta'úb mepu.
Masi sâ-sâ ka nminoin piuta onlê tefu
fun lalan i njali 'tasu neu oe ma afu,
tasík laba oras fêka ta'èuk napu.

Hanfuafin: Yohanes Manhitu
Yogyakarta, 28 Funsiô 2015
Posted by at No comments:

Nainunus naskeken kai kleö


Mu'ét! Neno hiut ma fai hiut he namsòpunen.
Kalobes, neno ma fai pukan feü he némanen.
Fini, nainunus naskeken kai kleö; pahe naen.
Neno i, manse nhoi; klêbes, in he nmaníken.

Hanfuafin: Yohanes Manhitu
Yogyakarta, 26 Funsiô 2015
Posted by at No comments:

Nmuî iunleko nbi naot


Ah! Ho lo ka musaitan mít fa au nekak anaot.
Nbi oras au 'fain òm, ho fê mubala on apaot.
Lalan i ka nmaneo fa onlê anef nâko klaot,
me nbi nenô aî fai, nmuî iunleko nbi naot.

Hanfuafin: Yohanes Manhitu
Yogyakarta, 25 Funsiô 2015
Posted by at No comments:

Au ufnekan funan


Nbi akimû, oras manse namneuken es tasi nanan,
fai natua nenô in balan, ma au ufnekan funan.
Mepu nbi neno mnanû i lof a-nmuî in fuan,
masi ala mlilê lê naheun nekak nanan.
Hanfuafin: Yohanes Manhitu
Yogyakarta, 21 Funsiô 2015
Posted by at No comments:

Mumép he musòp naot


Mumép he musòp naot amnanut
masi ho lalne nok aisaet-aisanut.
Nbi oras mu'èuk anin amanènut,
musnás fê, me kaisâ mukunut.

Hanfuafin: Yohanes Manhitu
Yogyakarta, 20 Funsiô 2015
Posted by at No comments:
Subscribe to: Posts (Atom)

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu
ymanhitu@gmail.com

Yogyakarta, 14 Funboësamnuâ 2007