Naote upan

Kalau susar ka nahunun mlilê, 
ma 'puse ka nahunun snasat, 
hit lof ka tahín fa naote upan 
ma tapnikan tain seunbanit.

(Yohanes Manhitu in tuis)

Pah-pinan he nak sâ

Kalu mumás me ala ho humam,
kalu mûmau me ala ho noni,
neu, pah-pinan he nak sâ?

(Yohanes Manhitu in tuis)

Njail feü ben

Fini, fini, ho mumneuk.
Noknokâ i ho mutból.
Ok-okê njail feü ben.

(Yohanes Manhitu in tuis)

Hanfuafin nèk Uab Metô nâko au Facebook

Yohanes Manhitu in tuis

1. Namén me oket namín, kaisâ namín nahún me namén namuin.
2. Ho humam amasat ma ama'èkit ataulnekaf nane ka nlem fa neu tabu afinit.
3. Haefes teme namolok neu manu, nak, "Kaisâ mkosteo mubala balam. Kalu ho lo maneunleüf ko, ete mutpén he msetul mít nope henait au ít ko."
4. Tjail asoit nak he tsutai susar.

Ue ‘Takaf Manekat?

Yohanes Manhitu in tuis

Batan a-npoi batan, ue nsek ue. 
Amaf a-nhuk ue, einaf a-nnâ ue.
Ue njali ‘maus âkninô mapanat,
ue nfanî ‘noinâ lê kamapnikan.
Tonas nak ue nanát neu alekot,
hanaf nak ue asoit nâko mono.

Pahe nnaomát, neno nsek neno,
ue in neno amasat namsòpen,
ue in mâtanen a-nsauk onlê noe.
Laismanekat ka on fa ue mapanat;
laismanekat nak lekat ma feinekat.
Mauthe ue nfain noe asait ma asakut.

Laismanekat ném nâko ue ama'èkit ka?
Hine nsai nâko ue in balan ametak ka?
Lasîpisat a-nkua nâko ue in tunan ka?
Sekau es a-nloim he nít bukti amaneot,
mauthe npanat in ue neu batan amunit.
Mumnau ue, mupane on teas ababat.

Yogyakarta, Funboësamnuâ 2003

Tpanat ma tamliab hit uabe piuta

Foto i mamnaitî nâko internet.

Uab Metô on 'takaf neu kit lof nabè' namneuk kalu hit ka tpanat tèk hit hanak ma tuis. Es onnane, masi tasaitan kuan ma bale, hit musti tpanat ma tamliab hit uabe piuta. Masi ka tpake neno-neno msâ, in kaisâ nasaitan hit nekak. In onlê hit nâ asait a-nbi hit aok nonon. Tmoni tbi pah moderen ka nak fa nak hit musti tnoes tain hit uab. Hit nabè' tânoinâ uab pahpanis natuin hit parlút (neu monit ma mepu), me tasaitan ma tapnikan/tnikan hit uabe, nane onlê "sanat budaya" 'naek neu kit ok-okê. 

(Yohanes Manhitu, Yogyakarta, 11/08/2013)

Noknokâ nemantea ben

 

Noknokâ nemantea ben,
nenomatne nhosén kit
nèk in pinan ahâtanes
oras tone he namsòpen.

(Yogyakarta, 29/12/2014)

Fai nanaob mepu

 

Mèsökan! Fai nanaob in mepu.
Tupas fai i fê namín lekleok,
me au uskék ma 'fen kuk
he ututan banit amunit.

(Yogyakarta, 29/12/2014)

Hanfuaf Maüp'in nâko 'Naef Plato

 

"Sekau es nânoinâ ma nânoinâ me ka napraktek fa sâ lê in nahíne, in onlê tuaf lê nâfoï ma nâfoï me ka npòlin fa fini."

---Plato, ahínfilsafat nâko Yunani
(Versi Metô nâko uab Spanyol: Yohanes Manhitu)