Fatu Sinai, Fatu Anaot

Nâko: Yohanes Manhitu

Fatu apaotasi, fatu aloët amenot.
Ho musaitan kuan ma bale mnasî,
mufètin toäs ma musaitan amonot
lê ka nahín nit fa selot matao masî.

Sisbaluf, ho lo msinmakan ton-ton;
nâ nâko haemenû ho mutoän piuta.
Nekmenas napoitan kun ini ‘loton
fun lomit apinat mapnikan piuta.

Nèshe nmeu, ho muhunun manas,
musaitan ho aombiam anuinnukat.
Pahe fê a-ntup, ho mnao ka musnás,
msèk naijan âtemes ma nasi apukat.

Maunnai ahinet mesê nasaitan tupas
npô pah-pinan lê fê nít nanait amasat.
Ka ahínlasi nkalab in manu nèk toäs
me ntofnon fun oe njail in bale snasat.

Munî i Kota Baoknan a-njail ho sobâ
masi in ka nèk ko sisi-‘makâ on bukae.
Neno i Pah Ambenû es napén ko, bae.
Fai-fai ho mít pinâ nâko in paukkabâ.

Yogyakarta, Funboësamnuâ 2003

Apaot ‘Maus Mantaën

Neu apanat budaya Timor ok-okê

Atoin-âmaut a-nsutai mnahas a-nbi lopo nanan

natuin in ka nahín fa nak in a-nmuî penâ ma ane.

Liänâ pah oni ka ntamis nít fa oni nbi hau tunan

fun napnikan oni in human masi nbi hau ‘kane.

Baë ma benû amanekat ki, hit i lo atoin-âmaut kit;

tatâ ma olî ahinet, hit es apaot ‘maus mantaën kit.

Bonet, lekûsene, fekut, bilut, ma heot musti maätî;

puah-manus, ‘tibâ ma kabî lobaithe kaisâ tapnikan.

Sekau es he nakain anislutuf nâko batan moderen?

Sekau es he ntulek dansa ma helat pah-matâteme?

Mauthe es-es a-npil kun in lalan natuin in fanderen.

Me ‘maus mantaën musti natpén piuta onlê teme.

Feku ma knobê mauthe napoin sin hanan alumat;

bonet, bilut ma bsoöt mauthe nhias elaf ma buat;

sít metô ma in pisut amasat mauthe neik kit kolit;

puah-manus nâko kabî ma ‘tibâ neik hit mahoet.

Yogyakarta, Funboësamnuâ 200

Yohanes Manhitu in tuis

Puah-Manus

 Nâko: Yohanes Manhitu

       Neu asén-puah ma asén-manus

Puah-manus, ‘takaf mahoet atoin-Timor;

puah-manus, asoitan lalan neu nekaf amanekat.

Sekau nmam puah-manus, nahín Timor in nekan;

sekau ntulek puah-manus, ntulek Timor in mahoet.

Puah-manus a-nmonin nbi naijamnesat ma akenib;

puah-manus mapanat, onlê hauleü fefmantaën;

puah-manus matalâ talantea tabu lê malekâ;

puah-manus a-npaisâ loit neu in asenat.

Oras amnemte ntea, kabî ma ‘tiö namkák.

Puah-manus maloëk ma okê makobâ;

molok ma uab a-nsain onlê noe asait.

Nekaf mesê ma ansaof mesê namép,

me feësat kanan banit mapnikan.

Yogyakarta, Funhitû 2003

In Kanne Loit

Nâko: Yohanes Manhitu

Loit, loit, loit ma loit…

Neno-neno loit ma loit piuta…

Loit naheun au nekak ka asumat.

Lalan nifun mesê musti mamnamî

he upein koal-es he ‘taul au monit.

Loit, loit, loit ma loit a-ntein.

Loit lo problema nbi au monit.

‘Tebes, loite ka usif fa neu monit i;

au msâ ka uüis fa eu loit: fatu aî sulat.

Me sekau es a-nmoin ka nok fa loit?

Loit, loit, loit ma loit neno-neno.

Amneiknek-amlilat msâ susar.

Loit namfau nabeî namlileb kit,

ka tmuî loit nabeî nasuseb kit.

Loit musti mamnamî piuta.

Me natuin lalan amaneot.

Aof amaëkit mâsosâ neu loit,

smanaf namneâ natuin loit;

Apakaet mapnikan fun loit.

Nalekoneis tapán hanaf i:

loit nane neu hit monit,

me monit ka neu fa loit.

Yogyakarta, Funsiô 2003

Oematâ 'Honis

Atuis: Yohanes Manhitu 

Nbi au mnitas alekot fai afinit nane,
au ít oe kninô abít nunuh 'naek in un.
Pah metan ma pah mutî natnanânane,
funan ma manas, ok-okê nabés neune.

Mafefâ-sin ninun nâko oe 'honis nane,
malaikat-sin napún-natefan in matan;
kolümu natpén natuin oematâ fafon.
Mansian, muït ninun nâko oe matan.

Sekaumsekau es niun nâko oematâ i,
lof ka nmeon fa ben talantea nabalbál.
Monit abalbalat lo npoi nâko 'bonî i,
noe 'honis lo nsai nâko nifu kninô i.

Kupang, Timor, Funnuâ 2004

Usî, Hai Mimnáh

Nâko: Yohanes Manhitu

Tfe kai mnahat

neno-neno, nok neno i…

(Onen Hai Amâ)

I lo ala pasu es nakín nuif:

metô, klibû nausan ketâ.

Hai tnanmin onlê ‘poni

lê makekâ neik aen’apâ.

Kabenu naub hai fefmin

ma napunan hai ‘nakmin.

Hai matmin nakoupunen

onlê nifu mnanû ameitis.

Sulpisâ naheun nok hanaf

neu kuan ma kota kaänenat

he nateab kai onen ma tulun,

he nkaus hai baut ma sutais.

Tala neno i hai fê mifnekan.

Hai ‘sane, hai ‘pele natselan.

Me malaikat onlê fê naskék

he nasaitan sonaf abalbalat.

Lekâ nesâ lof natua in balan

ma nkub nafanî nuif abolat?

Lekâ hai he miah tala mimsén

ma miun he meno namneuk?

Yogyakarta, Funsiô 2005

Atúkbijael

Nâko: Yohanes Manhitu

Atúkbijael, atoin-aomânafâ;

Ho es apaot neu ‘maus umenanan.

Ho es muhín oe ma nifu, aisaet-aisanut.

Ho msâ muhín kum pah-amonet amliat.

Ho ka musaitan mít fa ho feku alumat.

Kanan ho bijael lo nabesan neu ba ko

fun ho es sin atukus-atitus amanekat.

Atúkbijael, ho ‘puse lof ka namlia fa.

Ho feku alumat lof ka nanoi fa piuta

fun pah-amonet amliat ka nasuin fa.

Atoni nsai onlê Noe Benain ahenut.

Amonet amliat a-njail kuan-bale.

Kanan bijael ma ‘bibi maümê.

Ho musti mutai aptais feü.

Yogyakarta, Funhitû 2003

Napan Neon’akimû

Nâko: Yohanes Manhitu

Ho ka mumtausan mít fa neon’akimû ahakâtaus

fun manikin nane ho aptais, funan ho paku atanâ.

Ho aome naheun fomenî apaisâ mabun atpenes,

ho matme npin onlê aiflâ alalat nekaf amanikit;

ho kumanit ma lulum mtasâ naheun nok paisâ

neu ‘houpû naijamnesat ma ‘nuüf amnanut.

Kumanit natpén onlê anin, fomenî onlê nipu.

Mauthe pahe nsaehalâ he naüb nanait amasat.

Kaisâ mukain fai he nnaonfin natuin sinmakat.

Ó, napan neon’akimû, afnekan manit ma laün.

Sutra ahias nasaitan sonaf fautmarmer amaëkit,

sulpisâ manomer nâko aulpasu es natís neksalit.

Napan apaisâ, lekâ ho mfuat meu nekaf mesê?

Masit ho ka msinmakan fa sulat nok atuis mesê.

Tala lekâ opninef a-nfe ko sonâ he mpao akisot?

Tala lekâ ho musti msutai ho sinmakat in ukan?

Mnesat lof naheun nok humusu msâ hautoef,

bnoko akeitis lof a-nkuan fun kefan es naleün.

Yogyakarta, Funboësamnuâ 2003

Tiut’aenöek

Nâko: Yohanes Manhitu

Neu apaokolo-sin

Noknokmatê tasaitan ume
ma taen laba teu ‘saenpaokolo
he tafeitin matak ma takain muït.

Ttok on atitus a-tbi aenöek nanan,
koâ ma kalab naheun neno-tnanan.
Koläne ntok ma natpén onlê penpene.

Aen-amnatus namlileb hit nekak,
nfe lasifnekan neu atointani in monit
he kaisâ tamnáh me tah onlê usif âmaut.

Oras neno he nmouf, hit tasaitan bale,
tapasib-a ‘sane he tfain teu hit ume.
Nokâ noknokâ lof a-tfaintém.

Yogyakarta, Funhitû 2003