Usî, Hai Mimnáh

Nâko: Yohanes Manhitu

Tfe kai mnahat

neno-neno, nok neno i…

(Onen Hai Amâ)

I lo ala pasu es nakín nuif:

metô, klibû nausan ketâ.

Hai tnanmin onlê ‘poni

lê makekâ neik aen’apâ.

Kabenu naub hai fefmin

ma napunan hai ‘nakmin.

Hai matmin nakoupunen

onlê nifu mnanû ameitis.

Sulpisâ naheun nok hanaf

neu kuan ma kota kaänenat

he nateab kai onen ma tulun,

he nkaus hai baut ma sutais.

Tala neno i hai fê mifnekan.

Hai ‘sane, hai ‘pele natselan.

Me malaikat onlê fê naskék

he nasaitan sonaf abalbalat.

Lekâ nesâ lof natua in balan

ma nkub nafanî nuif abolat?

Lekâ hai he miah tala mimsén

ma miun he meno namneuk?

Yogyakarta, Funsiô 2005

Atúkbijael

Nâko: Yohanes Manhitu

Atúkbijael, atoin-aomânafâ;

Ho es apaot neu ‘maus umenanan.

Ho es muhín oe ma nifu, aisaet-aisanut.

Ho msâ muhín kum pah-amonet amliat.

Ho ka musaitan mít fa ho feku alumat.

Kanan ho bijael lo nabesan neu ba ko

fun ho es sin atukus-atitus amanekat.

Atúkbijael, ho ‘puse lof ka namlia fa.

Ho feku alumat lof ka nanoi fa piuta

fun pah-amonet amliat ka nasuin fa.

Atoni nsai onlê Noe Benain ahenut.

Amonet amliat a-njail kuan-bale.

Kanan bijael ma ‘bibi maümê.

Ho musti mutai aptais feü.

Yogyakarta, Funhitû 2003

Napan Neon’akimû

Nâko: Yohanes Manhitu

Ho ka mumtausan mít fa neon’akimû ahakâtaus

fun manikin nane ho aptais, funan ho paku atanâ.

Ho aome naheun fomenî apaisâ mabun atpenes,

ho matme npin onlê aiflâ alalat nekaf amanikit;

ho kumanit ma lulum mtasâ naheun nok paisâ

neu ‘houpû naijamnesat ma ‘nuüf amnanut.

Kumanit natpén onlê anin, fomenî onlê nipu.

Mauthe pahe nsaehalâ he naüb nanait amasat.

Kaisâ mukain fai he nnaonfin natuin sinmakat.

Ó, napan neon’akimû, afnekan manit ma laün.

Sutra ahias nasaitan sonaf fautmarmer amaëkit,

sulpisâ manomer nâko aulpasu es natís neksalit.

Napan apaisâ, lekâ ho mfuat meu nekaf mesê?

Masit ho ka msinmakan fa sulat nok atuis mesê.

Tala lekâ opninef a-nfe ko sonâ he mpao akisot?

Tala lekâ ho musti msutai ho sinmakat in ukan?

Mnesat lof naheun nok humusu msâ hautoef,

bnoko akeitis lof a-nkuan fun kefan es naleün.

Yogyakarta, Funboësamnuâ 2003

Tiut’aenöek

Nâko: Yohanes Manhitu

Neu apaokolo-sin

Noknokmatê tasaitan ume
ma taen laba teu ‘saenpaokolo
he tafeitin matak ma takain muït.

Ttok on atitus a-tbi aenöek nanan,
koâ ma kalab naheun neno-tnanan.
Koläne ntok ma natpén onlê penpene.

Aen-amnatus namlileb hit nekak,
nfe lasifnekan neu atointani in monit
he kaisâ tamnáh me tah onlê usif âmaut.

Oras neno he nmouf, hit tasaitan bale,
tapasib-a ‘sane he tfain teu hit ume.
Nokâ noknokâ lof a-tfaintém.

Yogyakarta, Funhitû 2003

Tafnekan Manas

Nâko: Yohanes Manhitu

Koé, manas apinat ma aklahat
afeitin ma asain meisökan
aliüt ma âhotô manikin
ahoit ma ametob pah,
mkios ma mu’ét kai fa
mnao-aum, mfonat-aum
he mlal ma mhaputuk kai
nbi manikin pah-pinan
nbi neno ulan ma fai ulan
nbi naijan aöet ma afu aöet
nbi betî apetas ma tais apetas.
Mnao-aum ma mhail-aum nai!

Yogyakarta, Funboës 2004

Monit Mafnekan

Nâko: Yohanes Manhitu

Au ‘nek is monit i fun namás,

au umnau is monit i fun namín.

au ‘sinmakan monit i fun naleok,

au he ‘moin piuta ntea nabalbal.

Monit i lo naheun nok tuamenû;

monit i naheun nok susar ma sutais.

Me nansâ es hit musti tjail amtaus?

Nokâ lof naheun nok susu ma oni.

Malinat lof ném kalu hit tafnekan,

malinat lof natból kalu hit tabeone.

Monit i musti naheun nok kumanit,

monit amlilat hit musti tafnekan.

Yogyakarta, Funhitû 2003

Sutaise In Fuan

Foto: https://www.nasirullahsitam.com

Atuis: Yohanes Manhitu

Neu ameput amakoetin

Oe nsai nâko ilaf aklimâ amanuat
naheun humaf ametak-amèsökat.
Oe nane ‘puse nâko manas ahoit,
humaf nane atointani in human.

Ulan ma manas, onlê amakisot
lê nateab hanaf alekot aî amleüt.
Koläne ma kolümu, onlê musu
lê nabák noni mnatû amnutus.

Nane atointani in sutais haukrús,
nane atointani in lalan neu firdaus;
nane atointani in enô neu malinat;
nane atointani in lakat neu tetus.

Lekâ ho mít oe nâlót ka nmapút?
Lekâ ho mít fani naäik kamanokê?
Mlilê alekot lof natból nâko sutais.
He tah onlê usif, tmeup onlê ate!

Kupang–Timor, Funnuâ 2004

Mauthe Hine Namlia

Foto: https://telepicturestv.com

Atuis: Yohanes Manhitu 

Nenô ma fai natpenen onlê kol’ane, 

nasaitan nain neno mnâ ma fai mnâ. 

Manas ma ulan néman ma nabaiksok, 

nânoinâ ko he mfen mûko ho monit 

he mnek kanan sulat ma ‘tuï aäikat. 

‘Maus aklimâ es kun ho mâtanem, 

laishine ma lolef ka masian kun fa. 

Kanan sulat ma ‘tuï ka masosâ mnitâ fa, 

muït ma mnautbuâ lo mapanat piuta; 

noni neu ‘noinâ ka matekâ mnitâ fa. 

Ò, smanaf ma aof amonit, mitnínfa! 

Pahe nnaomát, ka nník fa neu in kòtin, 

ka nsian fa onen totis, sanaen aî kanbait. 

Skole njali ‘maus amaneot ma atomas. 

Es onnane, mauthe amonit naskól. 

Yogyakarta, Funhitû 2003

Tamtís ma Tamnoû

Nâko: Yohanes Manhitu

Neno i es tabu ma leku mlilê

fun ok-okê tamtís ma tamnoû

tbi hiti ‘neolaät ma ‘saenlaät

he tpius ma tbait manekat

teik Usî In tetus ma halinat.

Mnahat ma mninut namtisin,

sisi ma ‘makâ namtekenen,

tuâ ma oe mninû matosî,

pules ma seunbanit maäitî,

haman ma hosén mateab,

luluf nok luluf nmafonan,

konif nok konif naëkun,

tetus ma nít namtisinen.

Yogyakarta, Funboës 2004