In onhe napnikan

Nbi neno anaot ma fai afinit lê kamapnikan,
tuafe nabelak taën asait nâko fefan amonit.
Me nbi neno i, naskeket in onhe napnikan
sâ-sâ lê nahunut in namolke ma njail salit.

Yohanes Manhitu in hanfuafin  
Yogyakarta, 23 Funhâ 2015

Mlak piuta meu matan

Sekau es a-nkuasa he naëkâ neno
lê ném ma nfin kun natuin in lomit?
Masi ho mloim kum he mhonêkotî,
ho musti mlak piuta meu matan.

Yohanes Manhitu in hanfuafin
Yogyakarta, 15 Funhâ 2015

Masit susar natau nekam

Kalu pisut ma sít napún-natefan ko,
me ho nekme ka naskék fa laba
he natuin sin ma ntamis mlilê,
masit susar natau ho nekam.

Yohanes Manhitu in hanfuafin
Yogyakarta, 15 Funhâ 2015

He Mupèn Malinat

Mpanat ho lomit,
muteut ho nekam,
mumepan ho salit,
mututan ho banit ma
mupèn kum malinat.

Tabu Alekot

Neonmabê i, tabu alekot
neu tokos, pisut, ma sít.
Tanekun tain neksusar
lê he natau nan monit.

Maria Magdalena

Foto: https://www.pinterest.com

Atuis: Yohanes Manhitu

            Veritas vos liberabit

Magdala Tarichaea, nane ho kuan.

Es onnane, Magdalena njail ho fam.

Unû atoni ka npiô fa leko ho lalan,

es ka namlilê fa he ntek ho kanam.

Sin nak, unû oras Guru he nbukae,

ho mhaumakE mèk ho minfomenî.

Mupét haene mèk nú fun ho mkae.

Ma ume nanan naheun nok fomenî.

Ho ‘nakamnafum a-njail toli anoset,

ho mnek In haene, okê ho mupete.

Nbi ume nanan nae, ho bifé ameset.

Atoinin lof nakan, “Hoè, mi’éte!”

Me meûsinê nemen neu pah-pinan

ma atoni nahín ho ka bifé asanab fa

lê unû nèk fomenî neu ume nanan.

Ho bifé es kun, ho ka bifé alahî fa.

Ho mutatuina Guru nbi In lalan

tala tabu In a-nsutai nbi haukrús.

Oras In nakalab mèsökan aükan,

mûko òpu, ho muskeken Petrus.

Yogyakarta, Funboësamnuâ 2003

---

*Veritas vos liberabit (Latín, Lais’amaneot lof nafètin ki)

"Quod scripsi, scripsi" nèk Uab Metô

"Sâ lê au 'tui ulali ben, matuï nabala."
--Ponsius Pilatus, gubernur Yudea (26–36 AD)