Gitanjali 25

Foto: Nâko filem "The Best Offer"

Nâko: Rabindranath Tagore

Nbi fai lê naheun nok haet, mauthe au ubelkok ka ‘beuksok, he utupâ au toese neu ko.

Mauthe au kaisâ ûsekê au smanak ahaete neu loitan kaälekot he nmòfhae neu ko.

Nane ho es a-mhel main fai in kastenus abít neno in matan ahaete he mûfeü in etse nbi fenat ini mlilen lê feü nnès.

Tlakab neu Uab Metô: Yohanes Manhitu

Gitanjali 05

Foto: www.google.com

Nâko: Rabindranath Tagore

Au ‘toit tabu kleö he ‘toko ‘bi ho bnapam. Kanan mepu lê au fê unaob, au lof umót sin namuin.

Ûló ûko ho humam benan, au nekke ka nahín fa tupas aî snasat, ma au mepu njail banit mâfenâ kaämsòput a-nbi mepu in tasi kamaninê.

Neno i, foknaise nemantean au neuspalaf nèk in noit ma ‘mutun; ma oinin a-npius sin bijól es naijamanuan nok nais-anâ asufat nae.

Oras i, tabu he ‘tok uëbok, ‘kios ho humam, ma èki ‘sín lasîtulû neu monit a-nbi mlilê a’ét ma ahenut-atöpas i.

Tlakab neu Uab Metô: Yohanes Manhitu