Nâko: Yohanes Manhitu
Manas a-npín ma nsounû klahan neu pah-pinan,
ntulun kanan hau-amonit he namót moêbukae;
nfe sonâ neu muït he nameu aokin nâko tume,
nafeitin tuaf he nasaitan ulan ma nameu nekan.
Atonîhonis in lomit lo humâ-humâ, ka ntû nít fa;
mansiane in sinmakat lo namfafau, onlê hausufâ.
Nbi oras manas a-nmapút nis, in nafnekan ulan;
nbi tabu ulan nasaib noe, in a-ntoit nenomatan.
Manas kaisâ mout mûsekê pah kiu bafê aminonit,
ulan kaisâ a-mfaes mumeu ane ma penâ amonit.
Ó manas, mfe kai ho pinam me kaisâ mususeb!
Ó ulan, msounû kai oe kninô me kaisâ mulemab!
Yogyakarta, Funboësamnuâ 2003
No comments:
Post a Comment