Friday, December 14, 2007

Álvaro Cunqueiro: Musti nmuî pah-mahonit bian, eslê hit molok


Álvaro Cunqueiro Mora (Mondoñeno, 22 Funboësamnuâ, 1911-Vigo, 28 Funtenû, 1981), nane unû utuis nâko Pah Galisia (pah-es npaumak nok Pah Portugal ma sin uabe onhe namnés nok uab Portugés). In atuis neu tuis namfau nèk uab Galisia ma Spanyol. Ini msâ nok nahakeb Asosiasi Atuis Galisia. In tuis-es eslê "Mil primaveras máis"
(Tabu haunasuin naef niufnes a-ntèn).

Nbi munin (‘pinan) i au uteab neu ki tuis mesê lê au ‘utlakab nâko Álvaro in tuis. Fun au fêka uhín fa uab Galisia, tuis i ‘tui ufanî nâko versi uab Inglés ma Spanyol. Me au utonan ki in versi uab Galisia henait hi mihín in uab asli onlê mé.

*****

Texto de Álvaro Cunqueiro

Eu quixen e quero que a fala galega durase e continuase, porque a duración da fala é a única posibilidade de que nós duremos como pobo. Eu quixen que Galicia continuase e, ao lado da patria terrenal, da patria que son a terra e os mortos, haxa estoutra patria que é a fala nosa. Se de min algún día, despois de morto, se quixese facer un eloxio, e eu estivese dando herba na terra nosa, podería dicir a miña lápida: "aquí xace alguén que coa súa obra fixo que Galicia durase mil primaveras máis".

==========

Traduccións ó dawan (uab meto/baikenu)
Au nâko unû ‘loim ma fê ‘loim he uab Galisia nabala ma nmoin piuta, fun hit uab in monit abalbalat es lalan mesleko neu kit he tmoin tabala on to(b). Nâko unû au ‘loim piuta he Pah Galisia nmoin nabala ma, nabua nok hit pah-mahonit, pah-mahonit abít pah-pinan ma amaetsin sini, musti nmuî pah-mahonit bian, eslê hit molok. Kalu nbi neno mesê, oras au ‘maet ulail, atoin-amfaut he npules kau, oras au umliab hun a-nbi hit pah, au niutnatê nabè' matuï nak: “Nbi bale i nabelkon tuafes lê natuin in mepu, nmoê Pah Galisia nmoin nabala talantea tabu haunasuin haef niufnes a-ntèn”.

3 comments:

Janela d'alma said...

Unû John, ho mepôt i lo esan. Na masan fin kase. Hit uab amasat i musti nmôen nabal-bal. Mas onane hit atoni pah metô musti tpanat tane on lê (a)mnatu mese. Aim ok-okê, tafena ma tafnekan hit uab amasat. Ho mepô ka babaun fa. Pules neu ko kase.

Nâko
Kens-abit-lisboa

Yohanes Manhitu said...

Aokbian Kenz, abít Pah Portugal. Ho hanam i ntom ma namlileb au nekak 'tebes. Hit uabe he nmoin aî he nmaet nunfín, nane nâko hit ok-okê kit, on in apanat ma amolok. Au 'tut utuin Álvaro Cunqueiro in hanan, nak "hit uab in monit abalbalat es lalan mesleko neu kit he tmoin tabala on to(b)". Es onane, aim he tpanat hit uab, masi hit, munî i, musti tsobal mâtanê he tamolok uab pah bian. Uamnanû neu Uab Metô ma Pah Timor amasat!

Anonymous said...

Neno ia au matke natsoe fun natuin le hit tuise mbi bael alekot i. Au uhinat ak uab meot e' ala atoin meot'es nahin nabal in kuane nanan, mes mini ia in sufaf ma in kauf sin natsoe naleuk pah-pah...esan fit nasaebe he atone bianamsat nahin le atoen meot e in fomenin. Fun alaha najan Timor es namoneb haubes le hit takettak Hau Meni. musuf terus usi at' fun natuian le hit sufaf nane hit nabeet nmoe uab meot'e nasoe pah-pah.

Hanfuaf Nonô Fauk ntomneu Uab Metô

Natuin laistenab nak Uab Metô, lê a-nmuî kanaf humaf bian onlê METO, UAB ATONI PAH METO, UAB PAH METO, TIMOR, TIMORESE, TIMOL, TIMOREESCH, TIMOREEZEN, DAWAN, TIMOR DAWAN, RAWAN, ma humaf bian (sumber: taklik teu i), ka nnès fa nâko tuaf 0.75 juta (baca: nol koma juta bôhitumním) es naüabe (= namolke) (sumber: the Indonesian Heritage, Language and Literature, 1998) nbi kabupaten (distrik) teun nok dialek (logat) humâ-humâ, au utenab ak uab i musti napèn hormat ma mateab neu pah-pinan nfunamnatéf. Au 'bèt an kanaf UAB METO fun in es mapakê namfau nnèsi nbi Pah Metô. Kanaf teun lê, natuin au tenab, nebè' mapakê msâ eslê UAB ATONI PAH METO, UAB PAH METO, ma DAWAN.

Kanaf DAWAN nane kanaf “matâteme”, fun fêka tít fa tuaf es nahín (kalu au ka 'san) lekâ kanaf nane nemantea atoin-Metô sin luekkin ma in nâko mé. Tuaf aüab Labit (= Uab Indonesia) sin, natám nok atoin-Metô sin kuk, onlêhe npaek tekas BAHASA DAWAN he nlekan neu UAB METO. Au uäkâ ak atoin-Metô namfau ma atoni biakini msâ a-nkios nak kanaf DAWAN nfain-on tekas Labit neu kanaf UAB METO. Lê i nebè'i nfain alasan nansâ es tekas i mapakê a-nbi bale-bale. Lasi i nabè'i ntom nak oras tuafes a-ntek kanaf aî tekas i, tuafes aî tuafin lê namolok nokne lof nalulub neöp neu Uab Meto aî neu atoin-Metô. Natuin hanaf i, natuin au lomit, 'bèt an kanaf nua in lê i nfain on judul neu blog i, nok tuis DAWAN nbi 'takaf nabit.

Tabê ma pules nâko blog tuaf,

Yohanes Manhitu

ymanhitu@ymail.com

Yogyakarta, 14 Funboësamnuâ 2007